Romans 1 - De Beebaa Dabu

De hagaboo

¹ Mai i daho Paul, tangada hai hegau o Klisdo Iesu gu hagahia laa gi se dangada tala, ma de hili ange gi daalaa de longo danuaa a de Maadua,

² gu lava laa i dana hagatoo donu madagidagi i daho ono pelaabisi i de Beebaa Dabu,

³ go de longo danuaa e tala ai laa dagodo o dana Dama Daane, gai ne haanau mai i de aamuli o David,

⁴ gai gu hagaago mai bolo ia go Tama Daane a de Maadua i ssauaa o de Hagasaalunga Dabu, i hiidinga dono mouli age mai i de magau: deenei, go Iesu Klisdo taadeu Dagi Maolunga.

⁵ Gai go ono hiidinga amaadeu ne maua ai i de kave de abodonu o de Maadua ma de hegau a tangada tala, gi maua ai e huaahenua alodahi i de hagallongo ange aama de kai ange gi de ia.

⁶ Gai goodou gu dau hogi madali dangada gu hagahia laa gi ni dangada niio Iesu Klisdo.

⁷ Ange gi dangada alodahi i Rome o de Maadua e aloha ai laa, gai gu hagahi e hai ai dangada o de Maadua: De abodonu ma de baba mai daho de Maadua taadeu Damana, aama mai i daho Tagi Maolunga go Iesu Klisdo gi dagodo i oodou daha.

De lodo o Paul e hano gi Rome

⁸ I mua nei, gai au e hagaahe ange de abodonu gi de Maadua i de ingoo o Iesu Klisdo i oodou hiidinga alodahi, go hiidinga dangada alodahi i henua i lalo gu langona dagodo o doodou kai ange gi de ia.

⁹ Gai go de Maadua dogu dangada hagadonu, gai au e hai hegau ange gi de ia i ogu lodo alodahi i dagu hagadele de longo danuaa o dana Dama, ia e iloo bolo au e dee tuu donu dogu dalodalo i goodou i masavaa alodahi,

¹⁰ ma de dangidangi gi dugua mai gi maua e au i de hanadu gi oodou daha, noo go lodo o de Maadua.

¹¹ Go hiidinga au e lodo mmao e tilo goodou, gai au ga gaavadu ai gi goodou hanu mee ngadi gaavange i de baasi gi de hagasaalunga e hagammahi ai oodou lodo,

¹² gai gidaadeu ga hagadau hagammahi ai i odaadeu kai.

¹³ Denga daina, au e lodo goodou gi tonu ange bolo gu dee modu donu dogu lodo e hanadu gi oodou daha, (aagai goi buibuia huu ga dae mai ai gi iainei); au e lodo hogi gi maua e au i de hai gi daahuli lodo o hanu i oodou magavaa, bei dagu hai gu maua ai laa i magavaa o denga Gentile ange laa.

¹⁴ Au e muli ange gi dangada alodahi gu skuulu aama gilaadeu tigi skuulu, ma gilaadeu e heiangi aama gilaadeu e ssenga.

¹⁵ Deenei ai, au gu lodo mmao hogi e agoago adu de longo danuaa gi goodou e nnoho i Rome.

Ssauaa o de longo danuaa

¹⁶ Go hiidinga au e dee dogaa donu i de longo danuaa nei, i hiidinga deenei ssauaa o de Maadua e hagamouli ai dangada alodahi e hagadonusia; ange gi de gau Ssuu i mua gai ange hogi gi denga Gentile.

¹⁷ Go hiidinga de longo danuaa e hagaago mai de heohi a de Maadua — go de heohi i de gai, mai i taamada ga dae ai gi de hagaodi, bei de hai gu sisi ai laa, “Tangada heohi e mouli i de gai.”

De bole o de Maadua i haisala o dangada

¹⁸ Gai de lili o de Maadua gu hagaago mai i de langi, e hagaduasala ai gilaadeu alodahi e dee hagadubulia de Maadua ma de gau baubau e buibuia laa gi dee sula de muna abodonu i alaadeu hegau baubau.

¹⁹ Gilaadeu gu iloo donu dagodo o de Maadua gu lava laa i de hagaago mai, go hiidinga de Maadua gu lava donu i de hagaago ange gi gilaadeu.

²⁰ Gai mai i taamada age de hagadau o henua i lalo, gai dagodo o de Maadua e dee gidee laa (dono sauaa e dee ngado laa ma ono dagodo e hagaagona mai laa bolo ia se Maadua abodonu) gu gidee danuaa i mee aana gu lava i de hai. Deenei ai, gilaadeu e dee maua donu i de hagataba bolo gilaadeu e dee iloo ia.

²¹ Go hiidinga gilaadeu gu iloo donu de Maadua, aagai gilaadeu tee hagamahamaha ia be se Maadua, aabe ne hagaahe ange de abodonu gi de ia, aagai alaadeu maanadu gu deai haigamaiana, gai olaadeu lodo gu hagagohu i de llodo senga.

²² Gilaadeu e hagataba bolo gilaadeu ni dangada heiangi, aagai gilaadeu ni dangada donu llodo ssenga;

²³ gilaadeu gu sui de daumaha ange gi de Maadua e deai laa se magau, gai ga daumaha ange gi denga diinonga e hagadulagi ange laa gi dagodo o dangada e maakau laa, ma denga manu llele, ma manu dolodolo aama manu e tolo laa i honga de gelegele.

²⁴ Deelaa ai, de Maadua gu tili ange donu huu gilaadeu gi hagassula ina olaadeu lodo hakino gee laa, gai gilaadeu ga hagadau hai ai denga hegau hagadookaa laa i olaadeu angaanga,

²⁵ go hiidinga gilaadeu gu hagahesuihagi de mee abodonu a de Maadua i de muna hhadu, ma de daumaha ange gi mee ne hai laa i taamada, tee daumaha ange gi de ia ne haia mee alodahi, go de ia e heohi taadeu tuhi ga hano ai! Amen.

²⁶ Aalaa hiidinga a de Maadua ne tili ange ai laa gilaadeu gi haia denga dahulinga hagadookaa. Denga haahine gu dee llodo e hagahebaa ma denga daane, gai gu hagadau dagodo haisala i olaadeu magavaa,

²⁷ gai e bei ai hogi denga daane, gilaadeu gu dee llodo e hagahebaa ma denga haahine, gai gu kona de llodo e hagadau dagodo haisala i olaadeu magavaa, denga daane gu dee dookaa i de hai denga dahulinga hagadookaa madali denga daane ange laa. Deelaa ai, gilaadeu gu kave de hagaduasala e heohi ange laa gi alaadeu dahulinga dee heohi.

²⁸ Gai go hiidinga gilaadeu tee llodo e daohi i olaadeu lodo de muna abodonu i dagodo o de Maadua, deelaa ai, ia gu tili ange gilaadeu gi haia denga maanadu llodo ssenga aama de hai denga dahulinga e dee heohi de hai.

²⁹ Gai alaadeu maanadu gu hoohonu i denga hagadaagangaa dahulinga dee heohi, ma de baubau, ma de nnoo hagamau mee, ma de maanadu baubau. Gilaadeu e llodo gaiaa mmao, ma de daa tangada gi magau, ma de hagadaumee, ma de daahanga dangada, ma de alasala, ma de kave muna hagabaubau,

³⁰ ni dangada hai samu, ma de kino i de Maadua, ma teai se hagadubu i olaadeu daha, ma de llodo maolunga, ma de pasa hagassoenga, ma de hagahale age mee baubau, ma tee hagallongo ange gi denga maadua,

³¹ ma de llodo ssenga, ma tee hai hegau i de mee abodonu, ma teai olaadeu aaloha, aama tee abodonu ange gi dangada.

³² Gai e dee galemu donu delaadeu iloo dagodo o de hagamodu heohi a de Maadua, bolo dangada e haia hegau bee nei e maakau donu, gai gilaadeu e dee duudagi donu huu de hai mee nei, aagai gilaadeu e malangilangi donu hogi i dangada e haia mee nei.