Revelation 9 - De Beebaa Dabu

¹ Gai togolima dangada de langi ga ili dana trumpet, gai au gu gidee dahi heduu i lo te langi e doo iho gi henua i lalo, gai gu gaavange gi de heduu laa de gii o de geelonga e deai laa sono dagelo.

² Gai ia ne hhuge de geelonga e deai laa sono dagelo, gai gu hanage dahi useahi bei de useahi o de ahi mmahi, gai de laa ma lo te moana gu gohu i de useahi mai i lo te geelonga laa.

³ Gai ne ssao mai ai hogi denga itebuubuu ga loiho gi henua i lalo, gai gu hai gilaadeu gi mmahi bei de mmahi o denga manu manga lua o henua i lalo.

⁴ Gai gu tala ange gilaadeu gi dee hagammae ina denga helii o henua i lalo, aabe go hanu manu ssomo nnui aama manu ange laa, aagai go dangada donu huu tigi hagailonga laa honga olaadeu lae i de hagailonga o de Maadua.

⁵ Gai denga itebuubuu laa gi hagaduasala ina donu huu dangada i e lima malama, gai e dee daa gilaadeu gi maakau. Gai gilaadeu e hagammae dangada bei de hai a de manu manga lua e hagammae ai laa tangada i dana kadi.

⁶ Laangi laa gai dangada e ssala naa delaadeu hai e maakau ai, gai e dee maua; gilaadeu e llodo mmao gi maakau gilaadeu, aagai de magau gu hano gee mai i gilaadeu.

⁷ Gai denga itebuubuu laa e bei dagodo o denga hoosa e hagadabena ange laa e hulo gi de hebagi; honga olaadeu biho iai hanu mee be ni hau goolo, gai olaadeu mada e bei mada o dangada.

⁸ Gai olaadeu ngaangaaulu e bei ngaangaaulu i biho o denga haahine, olaadeu niho e bei niho o denga laiono.

⁹ Olaadeu angaanga e haoli i hanu mee be ni unahi iron e buibui ai laa hadahada o taane hebagi, gai de gabagaba o olaadeu bakau e hagalongaa bei denga hada hebagi ma hoosa e saavini ange laa e hebagi.

¹⁰ Gai olaadeu sugi e hagammae bei sugi kangi o denga manu manga lua, gai olaadeu sugi iai ssauaa e hagammae ai dangada i e lima malama.

¹¹ Gai e dahi hodooligi e dagina gilaadeu, go tangada de langi o de geelonga e deai laa sono dagelo; dono ingoo i muna Hebrew go Abaddon, gai muna Greek go Apollyon.

¹² Tahi hagaduasala gu ui, gai tilo, e lua ange mee hagaduasala e loomai.

¹³ Gai togoono dangada de langi ne ili dana trumpet, gai au gu langona dahi leo e basa mai i denga hanga i honga dege e haa o de mommee o ssigidaumaha goolo i mada luu mada o de Maadua,

¹⁴ ga hai ange gi togoono dangada de langi ne ilihia laa de trumpet, “Daalaa mee noonoa o denga dangada de langi dogohaa e noonoa laa i ssaalingaa vai laumalie go Euphrates.”

¹⁵ Gai de gau de langi dogohaa laa, ne hagadabena ange laa gi de aoaa, ma de laangi, ma de malama, aama de ngadau laa, ne dugu gi hulo gi daia gi maakau dahi diba i diba e dolu o dangada.

¹⁶ Gai taelodo o de hagabuulinga hebagi e kage i honga hoosa se luasemada e hagalagolago ange gi e dahisemada; au ne langona de tala delaadeu taelodo.

¹⁷ Gai aanei dagodo o denga hoosa aagu ne gidee laa i dagu midi ma gilaadeu e kage ai: gilaadeu e kahu i mee buibui hadahada, gai e bei de leebunga o de ula o de ahi ma de hadu hagamogomogo go de sapphire ma sulfur, biho o denga hoosa laa e bei biho o denga laiono, gai de ahi ma de useahi aama sulfur e loomai i lodo olaadeu ngudu.

¹⁸ Gai denga mee hagamaakau laa ne daa ga maakau e dahi diba i diba e dolu o dangada alodahi, i de ahi ula ma de useahi aama sulfur e ssao mai laa i lodo ngudu o denga hoosa laa.

¹⁹ Gai mahi o denga hoosa laa go lodo olaadeu ngudu ma lodo olaadeu sugi iai. Olaadeu sugi e bei denga labodo hagammau, gai e hanu biho iai, gai go olaadeu sugi alaadeu e hagammae ai dangada.

²⁰ Gai dangada e doe tee maakau i denga mee hagamaakau laa, tee tili donu mee ne hai i olaadeu lima, gai tee tuu hogi delaadeu daumaha ange gi denga hagasaalunga ma diinonga ne hai laa i olaadeu lima, i goolo ma selevaa ma bronze ma hadu aama laagau, go mee e dee maua laa i de tilo be langona aabe go de seesee.

²¹ Gai gilaadeu tee daahuli gee donu i de daa dangada ga maakau, ma de hai huuhuaa mee, ma alaadeu dahulinga dagodo haisala aama de gaiaa.