Revelation 8 - De Beebaa Dabu

De hidu mee hagamakaga ma de mee e dudu ai mee maanongi

¹ Gai de masavaa huu a Ssiibi Gauligi ne oha ai de hidu mee hagamakaga laa, gai gu deai e hagalongaa i de langi i dahi baasi aoaa.

² Gai au ne gidee denga dangada de langi dogohidu e tuu laa i mada luu mada o de Maadua, gai gu gaavange gi gilaadeu e hidu trumpet.

³ Gai dahi dangada de langi ange laa ne humai ga duu i gaogao de mommee o ssigidaumaha, ma dahi mee goolo e dudu ai laa mee maanongi. Gai gu gaavange gi de ia hanu mee maanongi lagolago mmao, gai ia ga hai ai ssigidaumaha madali dalodalo a dangada o de Maadua alodahi, i honga de mommee o ssigidaumaha goolo i mada i mua o de nohoanga hodooligi laa.

⁴ Gai de useahi o mee maanongi laa gu buu age madali dalodalo a dangada o de Maadua, mai i lo te lima o tangada de langi e duu laa i mada luu mada o de Maadua.

⁵ Gai tangada de langi laa ga kave de mee e dudu ai laa mee maanongi, ga hhao ange de ahi gi ono lodo ga maga iho gi henua i lalo. Gai gu babaa denga hatuli, ma de ngaolo, gai gu labalaba denga uila, gai gu ngalungalue de henua.

Denga trumpet e hidu

⁶ De masavaa laa gai denga dangada de langi dogohidu e tuu laa ma alaadeu trumpet ne hagadabena e ili denga trumpet laa.

⁷ Tahi dangada de langi ne ili dana trumpet, gai gu too iho denga duudangaa haisi ma de ahi e hilo laa ma dodo gi henua i lalo. Gai dahi diba i diba e dolu o henua i lalo gu vela, madali dahi diba i diba e dolu o denga manu ssomo, aama denga helii alodahi.

⁸ Gai togolua dangada de langi ne ili dana trumpet, gai dahi mee be se mounga laumalie mmao e ula bei de ahi gu tili ange gi honga tai. Gai dahi diba i diba e dolu o tai gu ni dodo,

⁹ gai dahi diba i diba e dolu o denga manu alodahi e mouli i lausedi gu maakau, gai dahi diba i diba e dolu o denga vaga gu maoha.

¹⁰ Gai togodolu dangada de langi ne ili dana trumpet, gai dahi heduu laumalie mmao i lo te langi gu doo iho, gai e ula bei de lama gu haula laa, gai ne doo iho gi honga e dahi diba i diba e dolu o denga leevaa, ma denga saalingaa vai alodahi.

¹¹ Gai de ingoo o de heduu laa go de Mmala. Gai dahi diba i diba e dolu o denga vai gu mmala, gai gu soa dangada ne maakau i hiidinga o denga vai mmala laa.

¹² Gai togohaa dangada de langi ne ili dana trumpet, gai dahi diba i diba e dolu o de laa, ma de maasina, aama denga heduu gu hagagohu, gai dahi diba i diba e dolu o olaadeu maalama gu gohu; deelaa ai, dahi diba i diba e dolu o de laangi ma de boo gu deai se maalama iai.

¹³ Gai au ne gidee ma de langona dahi igele e hagadaba i de leo mmahi, i dono masavaa e lele ai i lo te moana, “E vakaa naa, e vakaa naa, e vakaa naa dangada e nnoho i henua i lalo, go hiidinga denga dangada de langi dogodolu ange laa gu dai ili naa alaadeu trumpet!”