Revelation 5 - De Beebaa Dabu

De beebaa mulo ma Ssiibi Gauligi

¹ Gai au ne gidee de ia e noho laa i honga de nohoanga laa e daohi dahi beebaa mulo i dono lima madau. Gai de beebaa laa e sisi ngaadahi ono lodo ma tua, gai gu mulo ma e hagamakaga i e hidu mee hagamakaga.

² Gai au ne gidee dahi dangada de langi mmahi e oo i de leo mmahi ma e hagadaba, “Goai e bau ange gi de hhuge de beebaa mulo laa, ma de oha denga mee e hagamakaga ai laa?”

³ Aagai teai donu se dangada i de langi be go henua i lalo, aabe go lalo de gelegele ne maua i de hhuge de beebaa mulo laa, ma de tilo ono lodo.

⁴ Gai au gu dangi mmao, i hiidinga e deai donu se dangada e bau ange gi de hhuge de beebaa mulo laa aama de tilo ono lodo.

⁵ Gai dahi i magavaa o denga daane maatua e dinolua ma dogohaa laa ne hai mai gi de au, “Aude dangi! Tilo, de laiono o de aamuli o Judah, go de Uli o David, ia gu kii, deelaa ai, ia e maua donu i de oha mee hagamakaga e hidu ma de hhuge de beebaa mulo laa.”

⁶ Gai au ne gidee hogi dahi Ssiibi Gauligi, e dagodo be se manu gu daia ma gu magau i mua, e duu i lo te ungaalodo o denga nohoanga laa, i magavaa o denga mee mouli laa aama denga daane maatua laa. Gai e hidu ono hanga ma e hidu ganomada, go denga hagasaalunga e hidu a de Maadua ne hai gi hulo gi henua i lalo alodahi.

⁷ Ia ne humai ga poo de beebaa mulo laa ga kave, mai i lo te lima madau o de ia e noho laa i honga de nohoanga hodooligi laa.

⁸ Gai de masavaa huu aana ne kave ai de beebaa laa, gai denga mee mouli e haa laa ma denga daane maatua e dinolua ma dogohaa laa, ga ino gi honga de gelegele i mada luu mada o Ssiibi Gauligi laa ga daumaha, gai dahi ma dahi e poo dahi harp, ma dahi boolo goolo gu hhao ma gu honu i mee maanongi, go dalodalo a dangada o de Maadua.

⁹ Gai gilaadeu ne daahili i dahi daahili hoou ga hagataba, “Koe e bau ange gi de kave de beebaa mulo ga oha ono mee hagamakaga, go hiidinga koe ne daa ga magau, e hagao ai dangada i oo dodo ga hagaahe mai gi de Maadua, mai i denga aamuli alodahi, ma dangada e pasa i denga hagadaagangaa muna alodahi, ma denga huaadangada aama huaahenua alodahi.

¹⁰ Koe gu hai gilaadeu gi se nohoanga hodooligi gai ni dangada haimeedabu niio taadeu Maadua, gai gilaadeu ga dagi ai i henua i lalo.”

¹¹ Gai au ne gidee hogi ma de langona leo o de gau de langi soa e dee maua laa i de dau, i luu baasi de nohoanga laa madali denga mee mouli laa aama denga daane maatua laa,

¹² e daahili ma e hagataba, “Ssiibi Gauligi ne daa laa ga magau, e bau ange gi de kave ssauaa, ma de lava, ma de heiangi, ma de mmahi, ma de hagadubu, ma de mahamaha aama de tuhi!”

¹³ Gai au ne langona mee alodahi i de langi ma henua i lalo, ma lalo de henua ma honga tai aama mee alodahi i mommee laa, e daahili ma e hagataba, “Gaavange gi de Maadua e noho laa i honga de nohoanga aama Ssiibi Gauligi de tuhi ma de hagadubu, ma de mahamaha aama ssauaa, ga hano ai e dee ngado mai.”

¹⁴ Gai denga mee mouli e haa laa ga hagataba, “Amen,” gai denga daane maatua laa ga ino gi lalo ga daumaha.