Revelation 4 - De Beebaa Dabu

De nohoanga i de langi

¹ Dua mee nei gai au ne galo age ga gidee, de haitoga o de langi gu mahuge. Gai de leo aagu ne langona laa i taamada, e bei laa de ili o de trumpet, ne basa mai gi de au ma e hai mai, “Humai gi lunga i kinei, gai au ga hagaago adu gi de goe mee e hai i muli mai.”

² De masavaa laa donu huu gai de Hagasaalunga ⌊Dabu⌋ gu hano iho gi ogu elunga, gai tilo, au gu gidee dahi nohoanga hodooligi i de langi, gai dahi e noho i honga de nohoanga hodooligi laa.

³ Gai de ia e noho ai laa e masalaba bei luu hadu hagamogomogo go de jasper ma de carnelian. Gai de umada e duuli ina laa luu baasi e bei de emerald.

⁴ Gai e madalua ma haa nohoanga e hagatau i luu baasi de nohoanga laa. Gai e dinolua ma dogohaa daane maatua e nnoho i honga denga nohoanga laa, gilaadeu e kahu i denga malo tea, ma de hagauda denga hau goolo i honga olaadeu biho.

⁵ Gai de nohoanga laa e labalaba mai ai denga uila, ma de babaa ai denga hatuli. Gai mada i mua o de nohoanga laa iai e hidu laama gu haaula. Aanei denga hagasaalunga e hidu o de Maadua.

⁶ Mada i mua o de nohoanga laa iai dahi mee be se vai masalaba, bei de galaasa ma de malamalama bei de crystal. Gai luu baasi de nohoanga laa iai e haa mee mouli, gai olaadeu aloalo ma olaadeu dua e dohu i denga ganomada.

⁷ Tahi mee mouli laa e bei dagodo o de laiono, de lua e bei de kaau daane, gai luu mada o tolu e bei luu mada o tangada, gai de haa e bei de igele e lele laa.

⁸ Denga mee mouli alodahi e haa laa e dagiono olaadeu bakau, gai olaadeu dua ma lalo olaadeu bakau e dohu i denga ganomada. Gai denga laangi ma boo alodahi gai gilaadeu e dee helui donu de hagataba, “E dabu, e dabu, e dabu Tagi Maolunga, de Maadua Mmahi Mmao laa, go de ia gu noho laa i taamada age, gai e noho iainei, gai e humai naa!”

⁹ Gai de masavaa naa huu a denga mee mouli laa e daahili ai, ga hagamahamaha ma de hagadubu, aama de hagaahe ange de abodonu gi de ia e noho laa i honga de nohoanga laa, go de ia e mouli laa ga hano ai e dee ngado mai,

¹⁰ gai denga daane maatua e dinolua ma dogohaa laa ga hagabaakuu gi honga de gelegele ga daumaha ange gi de ia e noho laa i honga de nohoanga laa, go de ia e mouli laa ga hano ai e dee ngado mai. Gai gilaadeu ga dugu ange olaadeu hau goolo gi mada i mua o de nohoanga laa, ga hagataba,

¹¹ “Tagi Maolunga demaadeu Maadua, koe e bau ange gi de kave de mahamaha ma de hagadubu aama de mmahi. Go hiidinga go koe ne haia mee alodahi, gai go dau hagatau ne haia ga hanu mee nei.”