Revelation 3 - De Beebaa Dabu

Muna ange gi de nohoanga dabu i Sardis

¹ “Gai siia ange muna nei gi tangada de langi o de nohoanga dabu i Sardis: Aanei muna mai i daho de ia e nnoho laa denga hagasaalunga dogohidu o de Maadua i ono daha, ma de daohi denga heduu e hidu laa. Au e iloo dagodo o au hegau. Koe e hagabinga bolo e mouli, aagai koe e magau donu.

² Koe gi alahage! Hagammahi ina mee e doe gu dai maakau laa, go hiidinga au gu gidee bolo au hegau tigi dohu abodonu i mada luu mada o de Maadua.

³ Deenei ai, manadua au mee gu lava i de kave ma de longo; daohia mee laa, gai dahuli oo lodo. Aagai noo koe e dee alahage, gai au e humai naa bei dagodo o tangada gaiaa. Gai koe e dee iloo donu de aoaa oogu e dae adu ai.

⁴ Gai goi hanu huu momo dangada i de nohoanga dabu i Sardis tigi vaigelegele olaadeu malo; gai gilaadeu e kahu naa i malo tea ga seesee ai madali au, go hiidinga gilaadeu e pau ange aagena.

⁵ Be goai e kii, gai ia e hakahu ange naa i malo tea bei dagodo o de gau nei, gai au e dee ssolo naa donu dono ingoo i de Beebaa o de Mouli. Gai au e tala hagadonu naa ono dagodo i mada luu mada o dogu Damana aama ono dangada de langi.

⁶ Be goai e hanu ono dalinga, gai ia gi hagalaangona muna a de Hagasaalunga ⌊Dabu⌋ e tala ange gi denga nohoanga dabu.

Muna ange gi de nohoanga dabu i Philadelphia

⁷ “Gai siia ange muna nei gi tangada de langi o de nohoanga dabu i Philadelphia: Aanei muna a de ia dabu laa, go de ia e hai hegau laa i de muna abodonu, go de ia e daohia de gii a David; dana mee e hhuge e deai donu e maua i de pono, gai dana mee e pono e deai donu e maua i de hhuge.

⁸ Au e iloo dagodo o au hegau. Tilo, au gu hhuge dahi abaaba i oo mada i mua, gai e deai donu e maua i de pono. Au e iloo bolo koe e dai deai donu oo mahi, aagai koe ne duudagi de daohi agu muna, koe tee hagadee iloo dogu ingoo.

⁹ Tilo, au e hai naa dangada o synagogue o Satan e hagataba laa bolo gilaadeu ni dangada Ssuu, aagai e dee ni dangada Ssuu abodonu, gai gilaadeu e hadu muna — au e hai naa gilaadeu gi loomai gi ino gi lalo i gaogao luoo vae, gi iloo ai e gilaadeu bolo au e aloha i de goe.

¹⁰ Koe ne daohi agu muna i doo hagaduu ngae ga golomagi oo lodo, deelaa ai, au e doange naa hogi goe i de masavaa o de hagaduasala e dae mai ai gi henua i lalo alodahi, e hagatale ai dangada e nnoho i henua i lalo.

¹¹ Au e moolau naa donu de humai. Deenei ai, goodou daohia donu huu de gai i oodou daha naa, gi deai ai se dangada e gaavee gee oodou hau.

¹² Be goai e kii, gai au e hai ia gi se duludulu i lo te temple o dogu Maadua. Gai ia e dee ahe ange naa donu e hano gee i kilaa. Gai au e sisi ange naa gi de ia de ingoo o dogu Maadua, ma de ingoo o de aduhale o dogu Maadua, go Jerusalem hoou, e hano iho laa i de langi i daho de Maadua, aama dogu ingoo hoou.

¹³ Be goai e hanu ono dalinga, gai ia gi hagalaangona muna a de Hagasaalunga ⌊Dabu⌋ e tala ange gi denga nohoanga dabu.

Muna ange gi de nohoanga dabu i Laodicea

¹⁴ “Gai siia ange muna nei gi tangada de langi o de nohoanga dabu i Laodicea: Aanei muna a de Amen, go de ia e hai hegau laa i de mee abodonu, gai se ia tala hagadonu abodonu, gai go ono daha ne daamada mai ai mee alodahi a de Maadua ne hai.

¹⁵ Au e iloo dagodo o au hegau: koe e dee maluulu gai e dee vvela hogi. Mee naa koe gi maluulu aabe gi vvela!

¹⁶ Gai go hiidinga koe e damaa mahanahana, koe e dee vvela gai e dee maluulu, au e luei mai naa goe gi daha!

¹⁷ Go hiidinga koe e hagadaba, ‘Au se dangada lava, au e hagadagadaga age, gai e deai donu se mee daudahi oogu e duasala ai.’ Koe e dee donu iho donu bolo koe e hai ngadaa ma de hagaaloha oo dagodo, ma de hagaau aloha, koe e dee gide ma teai oo malo.

¹⁸ Deenei ai, au e hai adu koe gi hagao ina hanu goolo gu lava laa i de hagadanuaa i de ahi i ogu daha, gi lava ai goe, ma de gahu i malo tea, gi dee hagadookaa ai oo dagodo i teai oo malo. Hagao ina hogi hanu valaai e hai ai luoo ganomada gi gide ai goe.

¹⁹ Au e hagasee donu ma de haele gilaadeu alodahi oogu e aloha ai. Deenei ai, koe gi hagammahi dahuli oo lodo.

²⁰ Tilo, au e duu i de haitoga ma e dugidugi ai. Be goai e langona dogu leo ga hhuge mai de haitoga, gai au ga ulu gi ono daha ga gaimee madali ia, gai ia madali au.

²¹ Be goai e kii, gai au e hai ia gi noho madali au i honga dogu nohoanga hodooligi, bei dogu hai ne kii ai laa hogi ga noho i honga de nohoanga hodooligi o dogu Damana.

²² Be goai e hanu ono dalinga, gai ia gi hagalaangona muna a de Hagasaalunga ⌊Dabu⌋ e tala ange gi denga nohoanga dabu.”