Revelation 21 - De Beebaa Dabu

De langi hoou ma henua i lalo hoou

¹ Gai au ne gidee de langi hoou ma henua i lalo hoou; gai de langi ma henua i lalo ne hai laa i taamada age gu llilo. Gai gu deai hogi se dai.

² Gai au ne gidee de aduhale dabu, go Jerusalem hoou, e hano iho i de langi i daho de Maadua, gai gu lava i de hagadanuaa bei dagodo o de hine gu dai hagahai bodu gu gahu laa e hagadabena ange gi dono bodu.

³ Gai au ne langona dahi leo mmahi e basa mai i de mommee iai de nohoanga laa, ma e hagadaba, “Tilo, de mommee noho o de Maadua gu i daho dangada. Gai de Maadua e noho naa i olaadeu daha, gai gilaadeu e hai naa go ono dangada, gai go ia delaadeu Maadua.

⁴ Ia e ssolo naa olaadeu loimada alodahi, gai gu deai ange naa donu se maakau, be go de hinangalosaa, be go de tangi, aabe go de mmae. Go hiidinga mee ne hai i taamada gu odi i de llilo ma gu deai.”

⁵ Gai de ia e noho laa i honga de nohoanga laa ga hagadaba, “Tilo, au e hai mee alodahi gi hoou.” Ia ne hagadaba hogi, “Siia mee nei, go hiidinga muna nei ni muna abodonu gai e heohi.”

⁶ Gai ia ne hai mai gi de au, “Gu lava mee alodahi! Go au de Alpha ma de Omega, go Taamada ma de Hagaodi. Au e hai naa tangada e hieunu gi unu i ssaalingaa vai o de mouli, e dee hagao donu.

⁷ Be goai e kii i mee nei, gai au e bolo ange de mee nei gi de ia; au e hai naa go dono Maadua gai ia go dagu dama.

⁸ Aagai de gau madagudagu, ma dangada tee hagadonusia, ma de gau hakino gee, ma de gau daa dangada, ma de gau dagodo haisala, ma de gau hai huuhuaa mee, ma dangada e daumaha ange gi denga diinonga, ma de gau hadu muna alodahi — delaadeu duuhanga go de ahi ula ma denga sulfur e sali laa bei de vai, deenei de lua magau.”

Jerusalem hoou, go de bodu o Ssiibi Gauligi

⁹ Gai gu humai dahi dangada de langi i magavaa o denga dangada de langi e dogohidu nogo tuu laa ma e daohi denga boolo e hidu e hhao ai laa denga mee hagamaakau hagaodi e hidu, ga basa mai gi de au, ga hai mai, “Humai, gai au ga hagaago adu gi de goe de hine gu dai hagahai bodu laa, go de bodu o Ssiibi Gauligi.”

¹⁰ Gai tangada de langi laa ne kave au gi honga dahi mounga maolunga mmao i ssauaa o de Hagasaalunga ⌊Dabu⌋ ga hagaago mai de aduhale dabu go Jerusalem e hano iho laa i daho de Maadua i de langi.

¹¹ Gai de mahamaha o de Maadua i kilaa, e malamalama bei dahi hadu hagamogomogo mmao, bei de jasper, ma de masalaba bei de crystal.

¹² Gai de buibui o de aduhale laa e laumalie ma de maolunga mmao, gai e madaangahulu ma lua ono haitoga, gai e dagidahi dangada de langi e hagaloosia denga haitoga laa. Gai honga denga haitoga laa e sisi ange aagena ingoo o denga aamuli o Israel e madaangahulu ma lua laa;

¹³ e dolu haitoga i de baasi i dua, e dolu i de baasi i ngaiho, e dolu i de baasi ngaage, gai e dolu i de baasi i dai.

¹⁴ Gai de buibui o de aduhale laa e madaangahulu ma lua ono dagelo, gai honga denga dagelo laa e sisi ange aagena ingoo o de gau tala a Ssiibi Gauligi e dinoangahulu ma dogolua.

¹⁵ Gai tangada de langi ne basa mai laa gi de au e poo dahi laagau goolo e haide ai de aduhale ma ono haitoga aama dono buibui.

¹⁶ De aduhale laa e tuu dege; dono lahalaha ma dono looloa se haidenga daudahi donu huu. Gai tangada de langi laa ne haide de aduhale laa i dana laagau haide, gai se 1,400 maele de looloa ma de lahalaha aama de maolunga, se dagodo daudahi donu huu.

¹⁷ Ia ne haide hogi de buibui o de aduhale, i de haidenga a gau de langi gai go de haidenga hogi o dangada e hai hegau ai, gai se 144 sugilima.

¹⁸ Gai de buibui laa ne hai i jasper, gai de aduhale ne hai i goolo danuaa mmao, gai e malamalama bei de galaasa.

¹⁹ Denga dagelo o de buibui o de aduhale laa e hagalaagii i denga hagadaagangaa hadu hagamogomogo alodahi. Tahi dagelo e hagalaagii i jasper, de lua dagelo ni sapphire, tolu ni agate, de haa ni emerald,

²⁰ de lima ni onyx, de ono ni carnelian, de hidu ni chrysolite, de valu ni beryl, ssiva ni topaz, de madaangahulu ni chrysoprase, de madaangahulu ma dahi ni jacinth, gai de madaangahulu ma lua ni amethyst.

²¹ Gai denga haitoga e madaangahulu ma lua laa ni ango; dahi haitoga e hai i dahi ango daudahi. Gai honga de haiava o de aduhale laa ni goolo danuaa e hai ai, gai e masalaba bei de galaasa.

²² Gai au tee gidee dahi temple i lo te aduhale laa, go hiidinga de temple i kilaa go Tagi Maolunga de Maadua Mmahi Mmao laa aama Ssiibi Gauligi.

²³ Gai e deai hogi se laa aabe se maasina o de aduhale laa, i hiidinga go de mahamaha o de Maadua e hagamaalama ina kilaa, gai de laama e hagamaalama ina kilaa go Ssiibi Gauligi.

²⁴ Gai denga huaahenua e seesee i dono maalama, gai denga hodooligi o henua i lalo e gaamai naa olaadeu goloa mahamaha gi de aduhale laa.

²⁵ Gai haitoga o de aduhale laa e deai naa donu se pono i de laangi, gai e deai naa hogi se boo i kilaa.

²⁶ Gai gilaadeu e gaamai naa goloa mahamaha ma de lava o denga huaahenua gi de aduhale laa.

²⁷ Aagai e deai donu se mee hakino gee e hagaulu mai gi kilaa, be se dangada e haia dahulinga hakino gee ma de mee hagasenga, gai go gilaadeu donu huu gu sisi laa olaadeu ingoo i de beebaa o de mouli a Ssiibi Gauligi e maua i de ulu i kilaa.