Revelation 20 - De Beebaa Dabu

De mano ngadau

¹ Gai au ne gidee hogi dahi dangada de langi e hano iho mai i de langi, gai ia e poo de gii o de geelonga e deai laa sono dagelo ma dahi seeini laumalie.

² Gai ia ne poo de dragon, go de labodo madagidagi laa, go de ia hagabaubau, go Satan, ga nnoa ia i e mano ngadau,

³ ga tili ange gi lo te geelonga e deai sono dagelo, ga pono de geelonga laa ga hagamakaga, gi dee maua ai e ia i de hagasenga denga huaahenua ga dae ai gi de odi ange de mano ngadau. Gai dua naa huu de masavaa laa gai ia gu tala gi hano saele i dahi masavaa bodobodo.

⁴ Gai au gu gidee hanu nohoanga hodooligi, gai gu gaavange ssauaa gi gilaadeu e nnoho i honga nohoanga laa e hagamodu ai muna. Au ne gidee hogi denga hagasaalunga o dangada ne duuduudia laa olaadeu ua, i hiidinga delaadeu tala hagadonu dagodo o Iesu ma muna a de Maadua, aagai gilaadeu tee daumaha ange gi de manu alasala laa aabe go dono diinonga, gai tee kave hogi dono maaga i honga olaadeu lae aabe go honga olaadeu lima. Gilaadeu alodahi gu mouli age ga hodooligi madali Klisdo i e mano ngadau.

⁵ Gai de gau maakau ange laa tee mouli age ga dae ai gi de odi de mano ngadau laa. Deenei tahi mouli age.

⁶ E manuuia ma de dabu gilaadeu e mouli age i tahi mouli age! Gu deai donu se sauaa o de lua magau i olaadeu elunga, aagai gilaadeu e hai naa gi ni dangada haimeedabu niio de Maadua ma Klisdo, gai gilaadeu ga dagi ai madali ia i e mano ngadau.

De hagaduasala o Satan

⁷ Gai ga odi ange huu de mano ngadau, gai Satan e tala naa ga hagasao mai i lo te hale pono,

⁸ gai ia e sao mai naa ga hagasenga denga huaahenua i henua i lalo alodahi, e bei go Gog ma Magog, ga hagabuni mai gilaadeu e hagadabena ange gi de hebagi; gai taelodo o de gau laa e bei denga gelegele i gabugabu tai.

⁹ Gai gilaadeu ne loomai i henua i lalo alodahi, ga duuli de mommee nnoho gaainga o dangada o de Maadua, go de aduhale oona e aloha ai laa. Aagai de ahi ne hano iho i de langi ga dudu gilaadeu gu maakau.

¹⁰ Gai de ia hagabaubau e daahangadia laa gilaadeu gu tili ange gi lo te ahi ula ma denga sulfur e ssali laa bei vai, go de mommee ne tili ange aagena de manu alasala ma de pelaabisi hadu muna laa, gai gilaadeu e hagaduasala naa i de laangi ma de boo ga hano ai e dee ngado mai.

De hagamodu muna o de gau maakau

¹¹ Gai au ne gidee dahi nohoanga hodooligi maolunga tea ma de ia e noho i ono elunga. Gai henua i lalo ma de langi ne moolau donu de ngaalue gee mai i mada luoono mada, gai teai selaau mommee ne gidee.

¹² Gai au ne gidee hogi de gau maakau, go gilaadeu e maolunga ma gilaadeu e maolalo, e tuu i mada i mua o de nohoanga laa, gai gu hhuge denga beebaa. Gai gu hhuge ange hogi dahi beebaa gee, deenei de beebaa o de mouli. Gai de gau maakau gu hagamodu olaadeu muna i mee gu sisi i lodo beebaa laa, gi bei dagodo o alaadeu hegau ne hai.

¹³ Gai gu mouli age de gau maakau i lo te dai, gai gu mouli age hogi de gau maakau i de mommee o de Magau ma Hades, gai gu hagamodu olaadeu muna, gi bei dagodo o alaadeu hegau ne hai.

¹⁴ Gai de mommee o de magau ma Hades gu tili ange gi lo te ahi e sali laa bei de vai. Deenei de lua magau.

¹⁵ Gai tangada e dee sisi dono ingoo i de beebaa o de mouli gu tili ange gi lo te ahi e sali laa bei de vai.