Revelation 19 - De Beebaa Dabu

De malangilangi i de langi

¹ Dua mee nei gai au ne langona dahi mee bei de hevaalogi o de hagabuulingaa dangada soa i de langi, e hagataba, “Hallelujah! De hagaola ma de mahamaha, ma de mmahi mmao ni mee nii taadeu Maadua,

² gai ana hagamodu ni muna abodonu ma de heohi. Ia gu hagamodu muna o de hine hai be se manu, ne haia laa ga hakino gee henua i lalo i de dagodo haisala, ma de sui ange dana daa ga maakau ono dangada hai hegau.”

³ Gai gilaadeu ne hevaalogi ange hogi ga hagataba, “Hallelujah! De useahi o de ahi e dudu ai de aduhale laa e buu naa donu huu ga hano ai e dee ngado mai.”

⁴ Gai denga daane maatua e dinolua ma dogohaa laa ma denga mee mouli e haa laa ga hagabaakuu gi honga de gelegele ga daumaha ange gi de Maadua e noho laa i honga de nohoanga, ga hagataba, “Amen. Hallelujah!”

⁵ Gai dahi leo ne basa mai i de nohoanga laa ma e hagadaba, “Duuhia taadeu Maadua, goodou ono dangada hai hegau alodahi, go goodou e maatagu i de ia, goodou e maolalo aabe e maolunga.”

⁶ Gai au ne langona dahi mee bei de hevaalogi o dahi hagabuulingaa dangada soa, ma de haganngolo o denga vai lagolago aama de babaa o denga hatuli nnui, e hagataba, “Hallelujah! Tagi Maolunga taadeu Maadua de Ia Mmahi Mmao laa gu hodooligi.

⁷ Gidaadeu ga malangilangi ma de llodo danuaa, aama de hagamahamaha ia, go hiidinga gu dae mai de masavaa o de hagahai bodu o Ssiibi Gauligi, gai dono bodu gu lava i de hagadabena ono mee,

⁸ gai de Maadua gu hai ia gi gahu i linen danuaa, ma de malamalama aama de gilimalali.” Gai linen danuaa laa go heohi o dangada o de Maadua.

⁹ Gai tangada de langi ne hai mai gi de au, “Siia de mee nei: E manuuia gilaadeu e saalaa ange gi taonga hagahai bodu o Ssiibi Gauligi.” Ia ne hai mai hogi gi de au, “Muna nei ni muna abodonu nii de Maadua.”

¹⁰ Gai au ga ino i gaogao luoono vae ga daumaha ange gi de ia, aagai ia ga hai mai gi de au, “Aude daumaha mai gi de au! Go hiidinga au se dangada hai hegau bei oo dagodo ma oo daina ne daohia laa muna e tala hagadonu ai dagodo o Iesu. Gai daumaha ange gi de Maadua.” Gai de tala hagadonu dagodo o Iesu go de Hagasaalunga donu o de basa pelaabisi.

De hoosa tea ma de ia e gage i ono elunga

¹¹ Gai au ne gidee de langi gu mahuge, gai tilo, dahi hoosa tea gu sao mai. Gai de ia e gage i ono elunga e hagaingoo ange go de Mee Abodonu ma de Heohi. Gai ia e hagamodu muna ma de hebagi i de heohi.

¹² Gai luoono ganomada e bei de ahi ula, gai ia e hagauda denga hau lagolago i honga dono biho, gai e dahi ingoo e sisi ange gi de ia, gai e deai donu se dangada e iloo dono hagadoonunga, go ia donu huu.

¹³ Gai de malo oona e gahu ai laa gu lava i de hagasulu ange gi lodo dodo. Gai dono ingoo go Muna a de Maadua.

¹⁴ Gai denga hagabuulingaa daane hebagi o de langi gu kahu i denga malo linen danuaa, gai e tea ma de gilimalali, gai gilaadeu e kage i honga denga hoosa tea ma e daudali ange ai i de ia.

¹⁵ Gai ia e hagadee kii denga huaahenua i de gadilaasa kangi baasi lua e sao mai laa i lo tono ngudu, ma de dagi gilaadeu i togo iron. Gai ia e dagadagahi naa denga grape ga hai gi ssali mai ai uvaini o de bole laumalie o de Maadua Mmahi Mmao laa.

¹⁶ Gai honga dono malo ma honga dono dege e sisi ange aagena de ingoo nei: “De Hodooligi o denga hodooligi ma Tagi Maolunga o denga dagi”.

¹⁷ Gai au ne gidee hogi dahi dangada de langi e duu i honga de laa. Gai ia ne oo i de leo mmahi ga hai ange gi manu alodahi e llele i lo te moana, “Goodou hagabuni mai gaimee i taonga laumalie a de Maadua,

¹⁸ e gai ai kano o denga hodooligi, ma denga dagi o de hebagi, ma denga daane hebagi mmahi, ma kano o denga hoosa ma denga daane e kage ai, ma kano o dangada alodahi e ilaage ma gilaadeu e dee ilaage, aama gilaadeu alodahi e maolunga aama de maolalo!”

¹⁹ Gai au ne gidee de manu alasala laa ma denga hodooligi o henua i lalo, madali olaadeu hagabuulinga hebagi gu hagabuni e hebagi ange gi de ia e gage laa i honga de hoosa, ma dono hagabuulinga hebagi.

²⁰ Gai de manu alasala laa ne nnoa, madali dono pelaabisi hadu muna ne haia laa denga hagailonga i ono mada i mua, ga hagasenga ai dangada, gilaadeu gi gaavee de maaga o de manu alasala laa, ma de daumaha ange gi dono diinonga. Gai gilaau ngaadahi gu maga ange gi lo te ahi ula i denga sulfur e sali laa bei de vai.

²¹ Gai dangada e doe ne daia ga maakau i de gadilaasa e sao mai laa i lo te ngudu o de ia e gage laa i honga de hoosa. Gai denga manu llele alodahi ne loomai ga gaimee gu boobosu i olaadeu kano.