Revelation 18 - De Beebaa Dabu

De maoha o Babylon

¹ Dua mee laa gai au ne gidee ange hogi dahi dangada de langi e hano iho i de langi, gai dono sauaa e laumalie mmao, gai henua i lalo alodahi gu maalama i dono mahamaha.

² Gai ia ne oo i de leo mmahi, ga hagadaba, “Gu maoha, gu maoha loo Babylon maolunga laa! Gai gu se mommee e nnoho ai denga hagasaalunga baubau, se mommee e mmuni ai denga hagasaalunga hakino gee alodahi, se mommee e nnoho ai denga manu llele hakino gee alodahi, aagai se mommee e mmuni ai denga manu dolodolo hakino gee alodahi ma de kino ai o dangada.

³ Gai denga huaahenua alodahi gu unu uvaini o dono dagodo haisala, go hiidinga denga hodooligi o henua i lalo gu dagodo haisala madali ia, de gau hagao mee o henua i lalo gu lava mmao i delaadeu ago ange i dono dagodo haisala.”

⁴ Gai au ne langona ange hogi dahi leo mai i de langi, e hagadaba, “Ogu dangada, goodou ssao hulo gee mai i ono daha, gi dee gaavee ai goodou ono haisala, gai gi dee tae mai ai denga mee hagamaakau gi goodou;

⁵ go hiidinga ono haisala gu hagabudubudu ma gu tae age loo gi de langi, gai de Maadua goi manadua donu ono baubau.

⁶ Suuia ange ana mee ne hai ange gi dangada, suuia ange gi lua hanonga e dubu ange ai; haia denga uvaini i lo tana ubu gi lua hanonga e mmahi ange ai.

⁷ Hagaduasala ina ia ma de hagadaemaha ina ia gi bei de hagamahamaha ma de mouli danuaa aana ne kave. Ia ne hagadaba i ono lodo, ‘Au se hine hodooligi e noho i honga dogu nohoanga hodooligi. Au e dee se hine gu magau dogu bodu, au e dee haihai naa donu ga hinangalosaa.’

⁸ Deelaa ai, denga mee hagamaakau e loomai naa gi de ia i e dahi laangi. Ia e duu ange naa gi de magau, ma de hinangalosaa, aama de onge. Gai ia e dudu naa ga vela i de ahi, go hiidinga Tagi Maolunga de Maadua e hagamodu ina laa ono muna e mmahi mmao.”

⁹ Gai denga hodooligi o henua i lalo ne llodo laa e dagodo haisala madali ia, e tangi naa ma de tangi see i ono hiidinga, i delaadeu masavaa e gidee ai de useahi o de ahi e dudu ai de aduhale laa.

¹⁰ Gai gilaadeu e hulo naa ga tuu i de mommee mmao i delaadeu maatagu i de hagaduasala o de aduhale laa, ga hagataba, “Gu vakaa loo! Gu vakaa loo! De aduhale laumalie, go Babylon, de aduhale mmahi! Doo hagaduasala ne duu adu gi de goe i e dahi donu huu aoaa!”

¹¹ De gau hagao mee o henua i lalo e tangi naa ma de hinangalosaa i de aduhale laa, go hiidinga gu deai donu dangada e hagao ina olaadeu goloa —

¹² go goolo ma selevaa, ma hadu hagamogomogo, ma ango, ma linen tea danuaa, ma malo purple, ma siliga, ma malo mmea, ma denga hagadaagangaa laagau maanongi alodahi, ma hagadaagangaa goloa ivory alodahi, ma hagadaagangaa laagau hagao ngadaa alodahi, ma bronze, ma iron ma marble;

¹³ ma cinnamon, ma mee hagamaanongi, ma mee maanongi e dudu laa, ma myrrh ma frankincense, ma uvaini, ma lolo olive, ma pelaoaa lligi, ma grain, ma kaau, ma ssiibi, ma hoosa ma hada hebagi, ma de gau hai hegau dee ilaage.

¹⁴ Gilaadeu e hagataba, “Denga huamanu oodou e hiigaina laa gu gaavee gee mai i oodou daha. Denga goloa hagamogomogo alodahi ma oodou mahamaha gu llilo, gai gu dee gidee ange naa donu!”

¹⁵ Gai de gau hagao goloa alodahi ma de maua olaadeu lava mai i ono daha, e hulo naa ga tuu i de mommee mmao, i hiidinga delaadeu maatagu i de hagaduasala o de aduhale laa. Gilaadeu e tangi naa ma de tangi see,

¹⁶ ga hagataba, “Gu vakaa loo! Gu vakaa loo, de aduhale maolunga, nogo gahu laa i linen tea danuaa, ma malo purple ma de mmea, ma de hagalaagii i denga goolo, ma hadu hagamogomogo, aama ango!

¹⁷ Go hiidinga ne dahi donu huu aoaa ne oha ai de lava o de aduhale laa ga deai!” Gai giabini alodahi, ma dangada e dele i de moana, ma de gau hai moni, aama dangada alodahi e hagao mee i honga de moana e hulo naa ga tuu i de mommee mmao,

¹⁸ ga tangi ai i de masavaa alaadeu e gidee ai de buu age de useahi o de ahi e dudu ai laa de aduhale, ga hagataba, “Tigi ai ange se aduhale ne bei dagodo o de aduhale laumalie nei!”

¹⁹ Gai gilaadeu ga hagamalili ange gelegele gi honga olaadeu biho ga tangi ai ma de tangi see i delaadeu hinangalosaa, ga hagataba, “Gu vakaa loo! Gu vakaa loo goe, de aduhale maolunga, go de mommee o dangada e hanu laa olaadeu vaga i honga tai ne hai ai ga kona de lagolago olaadeu goloa! Gai ne oha ga maoha i e dahi donu huu aoaa.”

²⁰ De langi, ma goodou dangada o de Maadua, ma de gau tala, aama denga pelaabisi, goodou malangilangi i dagodo o de aduhale laa! Go hiidinga de Maadua gu hagaduasala de aduhale laa i dana hagaduasala goodou!

²¹ Gai dahi dangada de langi mmahi ne poo age dahi hadu, bei de laumalie o dahi hadu mmili ga maga iho gi honga tai, gai ia ga hagadaba, “Deenei hogi de hai o Babylon, de aduhale maolunga laa, e tili iho ai ga maoha, gai e dee gidee ange naa donu.

²² Gai leo o mee hagadangidangi bei harp ma de gau daahili, ma de ilihia o denga flute, ma trumpet gu dee langona ange naa donu i kilaa. Gai gu deai hogi hagadaagangaa labagau e gidee i de mommee laa, gai gu dee langona hogi de hai hegau o de hadu mmili i oo daha.

²³ Gai gu deai hogi se maalama o de laama i kilaa. Gai gu dee langona hogi leo o taane ma de hine gu dai hagahai bodu. Oo dangada hagao mee ni daane dau i henua i lalo, gai huaahenua alodahi gu daahangadia i au huuhuaa mee.

²⁴ Gai dodo o denga pelaabisi ma dodo o dangada o de Maadua gu gidee mai i kilaa, aama dangada alodahi ne daia ga maakau i henua i lalo.”