Revelation 16 - De Beebaa Dabu

Boolo e hidu o de bole o de Maadua

¹ Gai au ne langona ange hogi dahi leo i lo te temple e basa ange gi denga dangada de langi dogohidu laa ma e hai ange, “Goodou hulo liingia ange gi henua i lalo mee i lodo boolo e hidu o de bole o de Maadua!”

² Gai tahi dangada de langi ne llingi iho mee i lo tana boolo gi henua i lalo, gai denga maanuga baubau ma de hagammae gu ssomo i dangada gu hagailonga laa i de maaga o de manu alasala laa ma de daumaha ange gi dono diinonga.

³ Gai de lua dangada de langi ne llingi ange mee i lo tana boolo gi honga tai, gai denga lausedi gu bei dodo o de gau maakau, gai mee alodahi e mouli i lausedi gu maakau.

⁴ Gai tolu dangada de langi ne llingi ange mee i lo tana boolo gi honga denga leevaa ma saalingaa vai, gai vai alodahi gu ni dodo.

⁵ Gai au ne langona tangada de langi e diiloo ange laa denga vai, e hagadaba, “De Ia Dabu Mmao laa, e heohi donu au hagamodu muna, koe e noho iainei gai ne noho madagidagi.

⁶ Go hiidinga dangada gu daa oo dangada dabu aama denga pelaabisi, gai koe gu hai gilaadeu gi unumia dodo, gai e heohi donu delaadeu hagaduasala i mee nei.”

⁷ Gai au ne langona de mommee o ssigidaumaha ne basa ga hai ange, “Uaa, Tagi Maolunga de Maadua Mmahi Mmao laa, au hagamodu muna ni muna abodonu gai e heohi!”

⁸ Gai de haa dangada de langi ne llingi ange mee i lo tana boolo gi de laa, gai gu gaavange ssauaa gi de laa gi duungia ai dangada i de ahi.

⁹ Gai dangada gu vvela olaadeu angaanga i de mmahi o de laa, gai gilaadeu ga pasa baubau i de ingoo o de Maadua niiona laa ssauaa e hai ai denga mee hagamaakau laa. Aagai gilaadeu tee daahuli donu olaadeu lodo e hagamahamaha ia.

¹⁰ Gai de lima dangada de langi ne llingi ange mee i lo tana boolo gi honga de nohoanga o de manu alasala laa, gai dono nohoanga hodooligi gu gohu. Gai dangada ga gadigadi olaadeu alelo i hiidinga de kona delaadeu duasala i de mmae,

¹¹ ma de pasa baubau i de Maadua o de langi i hiidinga delaadeu mmae aama hiidinga o olaadeu maanuga. Aagai gilaadeu tee daahuli donu olaadeu lodo e hulo gee i alaadeu hegau baubau.

¹² Gai de ono dangada de langi ne llingi iho mee i lo tana boolo gi honga de vai laumalie go Euphrates, gai de vai laa gu masa, e hai ai de haiava e hagadabena ange gi denga hodooligi mai i baasi dua.

¹³ Gai au ne gidee e dolu hagasaalunga baubau bei hoolinga o denga kailu, e ssao mai i lo te ngudu o de dragon, ma lo te ngudu o de manu alasala laa, aama lo te ngudu o de pelaabisi hadu muna laa.

¹⁴ Aagai denga hagasaalunga baubau laa e hai denga sauaa, gai gilaadeu ne hulo gi daho denga hodooligi alodahi o henua i lalo, ga hagabuni mai gilaadeu e hagadabena ange gi de hebagi i de laangi maolunga o de Maadua Mmahi Mmao laa.

¹⁵ “Tilo, au e humai naa bei dagodo o tangada gaiaa, gai e manuuia tangada e dagitilo gai e gahu i ono malo, gi dee gilisau ai ia ma de dogaa.”

¹⁶ Gai denga hagasaalunga baubau laa ne hagabuni denga hodooligi i de mommee e hagaingoo ange laa go Armageddon i muna Hebrew.

¹⁷ Gai de hidu dangada de langi ne llingi ange mee i lo tana boolo gi lo te moana i lunga. Gai dahi leo mmahi ne basa mai i honga de nohoanga i lo te temple, ga hagadaba, “Gu lava!”

¹⁸ Gai gu labalaba denga uila, ma de hagalongaa i de babaa o denga hatuli, gai gu kona de ngalungalue o de henua. Tigi ai ange se ngalungalue o de henua bee nei mai i taamada de nnoho o dangada i henua i lalo, i hiidinga de kona de laumalie de ngalungalue o de henua.

¹⁹ Gai de aduhale laumalie laa gu vvae dolu, gai aduhale o denga huaahenua gu maoha. Gai de Maadua gu manadua dagodo o Babylon maolunga laa, ga hai de aduhale laa gi unumia mee i lo te ubu o dono bole.

²⁰ Gai denga modu alodahi gu llilo, denga mounga alodahi gu dee gidee,

²¹ gai denga dibadibaa haisi nnui, agu made e dagillau pauni de daemaha, gu too iho i de langi gi honga o dangada. Gai dangada ga pasa baubau i de Maadua i hiidinga de kona de hagamaatagu o de mee hagamaakau go denga dibadibaa haisi laa.