Revelation 15 - De Beebaa Dabu

De gau de langi dogohidu ma mee hagamaakau

¹ Gai au gu gidee ange hogi dahi mee hagamanavasaa ma de hagalele mouli i de langi: e dogohidu dangada de langi madali denga mee hagamaakau e hidu, go mee hagamaakau hagaodi, i hiidinga aanei mee e hagahonu ai de bole o de Maadua.

² Gai au ne gidee dahi mee be se vai masalaba bei de galaasa e ula ai de ahi, gai gilaadeu ne kii laa i de manu alasala laa, ma dono diinonga aama de nambaa o dono ingoo, e tuu i gaogao de vai laa. Gai gilaadeu e daohi denga harp a de Maadua gu gaavange laa gi gilaadeu.

³ Gai gilaadeu ne daahili i taahili a Moses, tangada hai hegau o de Maadua, ma taahili a Ssiibi Gauligi, ga hagataba, “Tagi Maolunga de Maadua Mmahi Mmao laa, ga dae laa de hagamaatagu ma de hagalele mouli au hegau! Au hegau e heohi gai ni mee abodonu, de Hodooligi o denga huaahenua.

⁴ Tagi Maolunga, goai e dee madagu ma tee hagamahamaha ina doo ingoo? Go koe donu huu e dabu. Denga huaahenua alodahi e loomai naa ga daumaha adu gi de goe, go hiidinga koe gu hagaago mai au hagamodu heohi.”

⁵ Dua de mee nei gai au ne gidee de hale malo o de tala hagadonu i lo te hale dabu i de langi gu hhuge,

⁶ gai e dogohidu dangada de langi gu ssao mai i lo te hale dabu ma e hidu mee hagamaakau, gai gilaadeu e kahu i linen tea malamalama, gai e hanu mee dau goolo i honga olaadeu hadahada.

⁷ Gai dahi mee mouli i gilaadeu e dogohaa laa ne gaavange gi denga dangada de langi dogohidu laa e haa boolo goolo gu hhao ma gu hoohonu i de bole o de Maadua e mouli laa ga hano ai e dee ngado mai.

⁸ Gai de useahi o de mahamaha o de Maadua ma dono sauaa gu hhao lo te hale dabu, gai gu deai donu dangada e maua i de ulu gi lo te hale dabu, ga dae ai gi de odi i de hai denga mee hagamaakau e hidu a denga dangada de langi dogohidu laa.