Revelation 14 - De Beebaa Dabu

Ssiibi Gauligi ma de 144,000

¹ Gai au ne galo adu ange gu gidee Ssiibi Gauligi e duu i honga de mounga go Zion, gai e tuu madali ia e 144,000 dangada gu sisi ange gi honga olaadeu lae dono ingoo ma de ingoo o dono Damana.

² Gai au gu langona dahi leo mai i de langi bei de ngolo o denga vai lagolago ma de paa o de hatuli; gai de leo aagu e langona laa e bei de hagadangidangi o denga harp.

³ Gai gilaadeu ne hua dahi daahili hoou i mada i mua o de nohoanga laa, ma denga mee mouli e haa laa, aama denga daane maatua laa. Gai e deai donu se dangada e iloo taahili laa, go togo 144,000 donu huu gu hagao mai laa i henua i lalo.

⁴ Gai de gau laa alodahi ni daane gilimalali, gilaadeu tigi hulo gi daho denga haahine e hai ai gi hakino gee gilaadeu. Aanei gilaadeu e daudali ange laa i Ssiibi Gauligi i mommee alodahi oona e hano aagena. Gilaadeu nei gu lava i de hagao ma gu hagaola mai i magavaa o dangada e hai ai denga hua i taamada ange gi de Maadua ma Ssiibi Gauligi.

⁵ Gai e deai donu se hadu muna e gidee i olaadeu daha; gai gilaadeu e gilimalali.

De gau de langi dogodolu

⁶ Gai au ne gidee ange hogi dahi dangada de langi e lele i lo te moana i lunga, ia e kave de longo danuaa dee ngado mai laa, e tala ange gi dangada e nnoho i henua i lalo, go denga huaahenua ma denga aamuli, ma dangada e pasa i denga hagadaagangaa muna, aama denga huaadangada alodahi.

⁷ Gai ia ne oo i de leo mmahi ga hagadaba, “Goodou maatagu i de Maadua, gai hagamahamaha ina ia, go hiidinga de aoaa aana e hagamodu ai muna gu dae mai donu; gai daumaha ange gi de ia ne haia de langi ma henua i lalo, ma tai aama denga saalingaa vai.”

⁸ Gai togolua dangada de langi ne daudali ange ga hagadaba, “Gu maoha! Gu maoha loo Babylon maolunga laa, go de aduhale ne haia denga huaahenua alodahi gi unumia uvaini o dono dagodo haisala!”

⁹ Gai togodolu dangada de langi ne daudali ange laa i gilaadeu, ne oo ga hagadaba, “Gilaadeu e daumaha ange gi de manu alasala laa ma dono diinonga, aama de hagailonga honga olaadeu lae aabe go honga olaadeu lima madau i de maaga o de manu alasala laa,

¹⁰ e unu naa hogi uvaini mmahi o de bole o de Maadua, e dee hilo laa ga llingi ange ai gi lo te ubu o dono lili. Gai ia e hagaduasala naa donu i de ahi ma denga sulfur, i madamada o denga dangada de langi dabu ma mada luu mada o Ssiibi Gauligi.

¹¹ Gai de useahi o de ahi e hagaduasala ai laa gilaadeu, e buu ga hano ai e dee ngado mai. Gai e deai donu se hagammabu o dangada e daumaha ange laa gi de manu alasala laa ma dono diinonga, aama gilaadeu alodahi gu gaavee de maaga o dono ingoo, i de laangi ma de boo.”

¹² De mee nei se hagahi ange gi dangada o de Maadua gilaadeu gi golomagi ina olaadeu lodo, go gilaadeu e daohia muna a de Maadua ma de daohi delaadeu kai ange gi Iesu.

¹³ Gai au ne langona dahi leo mai i de langi, e hagadaba, “Siia de mee nei: E manuuia tangada e magau i lodo o Tagi Maolunga mai iainei ga hano ai.” Gai de Hagasaalunga ⌊Dabu⌋ ne hagadaba, “Uaa, gilaadeu e manuuia donu! Gilaadeu e hagammabu naa i alaadeu hegau, gai alaadeu hegau e daudali ange naa donu huu i gilaadeu.”

De hagihagi mee o henua i lalo

¹⁴ Gai au ne galo age hogi gu gidee dahi giliiga tea, gai honga de giliiga laa e noho ai dahi e bei hoolinga o tangada, honga dono biho iai dahi hau goolo, gai ia e poo dahi kamaa kangi i dono lima.

¹⁵ Gai gu sao mai ange hogi dahi dangada de langi i lo te temple, gai ia ga oo i de leo mmahi ga hai ange gi de ia e noho laa i honga de giliiga, “Haia dau kamaa duuduudia ai denga grain, i hiidinga gu dae mai de masavaa o de hagihagi; gai hua o henua i lalo gu maatua ma gu lleu.”

¹⁶ Gai de ia e noho laa i honga de giliiga ga hagaabo ange dana kamaa gi honga henua i lalo, gai henua i lalo gu odi i de hagihagi.

¹⁷ Gai gu sao mai ange dahi dangada de langi i lo te temple i de langi, gai e dahi hogi ana kamaa kangi.

¹⁸ Gai gu sao mai ange dahi dangada de langi i de mommee o ssigidaumaha, go de ia e dagidiiloo de ahi laa, gai ia ne oo i de leo mmahi ga hai ange gi tangada de langi e daohia laa dahi kamaa kangi, “Haia dau kamaa duuduudia ai denga gau looloa o de grapevine o henua i lalo, go hiidinga ono grape gu lleu.”

¹⁹ Gai tangada de langi laa ga hagaabo ange dana kamaa gi honga henua i lalo, ga hagihagi ai ono grape, ga tili ange gi de mommee kumi uvaini o de bole o de Maadua.

²⁰ Gai mee nei ne dagadagahi i de mommee kumi uvaini i tua de aduhale, gai denga dodo ne ssali mai i de mommee kumi uvaini, ga hagahonu age ga dae age gi taula i de ngudu o de hoosa, gai de looloa o de mommee iai dodo laa se 180 maele.