Revelation 13 - De Beebaa Dabu

De manu alasala ne hanage laa i lausedi

¹ Gai au ne gidee dahi manu alasala e hanage i lausedi, gai e madaangahulu ono hanga ma e hidu biho, gai denga hanga e madaangahulu laa iai dagidahi hau, gai honga ono biho iai denga ingoo e hagangadi mee ai de Maadua.

² Gai de manu alasala aagu e gidee laa e bei de leopard, ono vae e bei vae o de bea, gai dono ngudu e bei de ngudu o de laiono. Gai de dragon ne gaavange dono sauaa ma dono nohoanga hodooligi, aama dono duulanga maolunga gi de manu alasala laa.

³ Gai dahi biho o de manu alasala laa e dagodo be gu lagohia ma gu dai magau, aagai dono maanuga gu mahu. Gai henua i lalo alodahi ga daudali ange i de manu laa, i hiidinga de llele olaadeu mouli.

⁴ Gai dangada ga daumaha ange gi de dragon i hiidinga de dragon gu gaavange dono sauaa gi de manu alasala laa, gai dangada e daumaha ange gi de manu laa, ga hagataba, “Goai e bei dagodo o de manu alasala laa? Gai goai e maua i de hebagi ange gi de manu laa?”

⁵ Gai gu dugu ange de manu alasala laa gi basa hagamaolunga e hagangadi mee ai de Maadua, aama de hagahai hegau dono sauaa i e madahaa ma lua malama.

⁶ Gai de manu laa ne basa ga hagangadi mee de Maadua, ma dono ingoo ma dono mommee e noho ai, aama gilaadeu e nnoho i de langi.

⁷ Gai gu gaavange ssauaa gi de manu laa gi hebagi ange ai gi dangada o de Maadua, ma de hagadee kii gilaadeu. Gai gu gaavange gi de ia ssauaa e dagi ai denga aamuli alodahi, ma denga huaadangada, ma dangada e pasa i denga hagadaagangaa muna, aama denga huaahenua alodahi.

⁸ Gai dangada alodahi e nnoho i henua i lalo ga daumaha ange gi de manu laa — go dangada alodahi tee sisi olaadeu ingoo i de beebaa o de mouli a Ssiibi Gauligi ne daa laa ga magau i mua de hai o henua i lalo.

⁹ Be goai e hanu ono dalinga, gai ia gi hagalaangona.

¹⁰ Noo tangada e kave gi dahi henua gee, gai ia e gaavee naa donu gi dahi henua gee. Noo e daa ia gi daa gi magau i de gadilaasa, gai ia e daia naa donu gi magau i de gadilaasa. De mee nei se hagahi ange gi dangada o de Maadua, gilaadeu gi hagaduu ngae i de golomagi lodo ma de gai.

De manu alasala ne hanage laa i lo te gelegele

¹¹ Gai au ne gidee ange hogi dahi manu alasala e hanage i lo te gelegele, e lua ono hanga bei hanga o dahi ssiibi gauligi, gai e basa bei de dragon.

¹² Gai ia ne hai hegau i ssauaa alodahi o tahi manu alasala laa ga sui ai tahi manu laa, ma de hai henua i lalo ma dangada e nnoho ai gi daumaha ange gi tahi manu alasala laa, go de manu alasala ne mahu laa dono maanuga kona laa.

¹³ Gai de lua manu alasala laa ne hai denga hagailonga nnui, gai ne hai donu hogi ga hano iho de ahi i de langi gi henua i lalo i madamada o dangada,

¹⁴ ga hagasenga ai dangada i henua i lalo, i hiidinga o denga hagailonga aana e hai i ssauaa o de manu alasala laa. Gai ia ne hai dangada gi hagaduulia dahi diinonga, gi hagadulagi ina ange gi de manu alasala ne lagohia laa i de gadilaasa, gai tee magau.

¹⁵ Gai gu gaavange ssauaa gi de lua manu alasala laa gi haia ai gi manamanava tiinonga laa, gai tiinonga laa gu maua i de basa, ma de daa gi maakau dangada e dee daumaha ange gi tiinonga o de manu laa.

¹⁶ Gai ia ne hai gi de mahi dangada alodahi, de gau maolalo ma de gau maolunga, de gau lava ma de gau hagaau aloha, de gau ilaage ma de gau hai hegau, gai gilaadeu ga kave ai de maaga i honga olaadeu lima madau aabe go honga olaadeu lae,

¹⁷ gai gi dee maua ai e tangada i de hagao aabe go de hagao gi daha dahi mee, noo ia e dee kave de maaga laa, go de ingoo o de manu alasala laa, aabe go taelodo o dono ingoo.

¹⁸ De mee nei go de heiangi e maua ai: tangada e donu ange gi guumia ange de nambaa o de manu alasala laa, go hiidinga se nambaa niio dahi dangada, gai dono nambaa se 666.