Revelation 12 - De Beebaa Dabu

De hine ma de dragon

¹ Gai dahi hagailonga hagalele mouli gu hagasula iho i de langi: dahi hahine e gahu i de laa, gai de maasina i lalo luoono vae, gai honga dono biho iai dahi hau e madaangahulu ma lua heduu iai.

² Ia gu hai dama, gai ia e dangi i hiidinga dono mmae i de hai ono hagalangona.

³ Gai gu hagasula mai ange dahi hagailonga hagalele mouli i de langi: au ne gidee dahi dragon mmea ma de laumalie gai e hidu ono biho ma e madaangahulu hanga, gai e dagidahi hau i honga ono biho e hidu laa.

⁴ Gai dono sugi ne hagailiili ga too iho gi henua i lalo, dahi diba i diba e dolu o denga heduu i lo te langi. Gai de dragon laa e duu i mada i mua o de hine gu dai haanau laa, gai ia ga gai ai tama a de hine laa i de masavaa e haanau mai ai.

⁵ Gai de hine laa ga haanau dahi dama daane, go tama e dagina huaahenua alodahi i togo iron. Aagai dana dama gu boogia ga gaavage gi daho de Maadua ma dono nohoanga.

⁶ Gai de hine laa gu savini ga hano gi de vao i de mommee a de Maadua gu lava laa i de hagadabena, gi diiloo ange ai ia i e 1,260 laangi.

⁷ Gai gu hai hogi de hebagi i lo te langi i lunga; Michael ma ono dangada de langi e hebagi ange gi de dragon, gai de dragon ma ono dangada de langi e hebagi ange gi gilaadeu.

⁸ Aagai de dragon ma ono dangada tee kii, gai gu deai selaadeu mommee e nnoho ai i de langi.

⁹ Gai de dragon laumalie laa gu tili iho gi lalo, go de labodo madagidagi e hagaingoo ange laa go de ia hagabaubau aabe go Satan, gai go de ia e hagasengalia laa dangada i henua i lalo alodahi — ia gu tili iho gi henua i lalo madali ono dangada de langi alodahi.

¹⁰ Gai au ne langona dahi leo mmahi i de langi e hagadaba, “Gu baa mai de hagaola, ma ssauaa, ma de nohoanga hodooligi o taadeu Maadua, ma ssauaa o dana Klisdo e dagi ai. Go hiidinga de ia e hagabaubau ina odaadeu daina, ma de hagabaubau ina gilaadeu i mada luu mada o de Maadua, i de laangi ma de boo gu tili iho gi lalo.

¹¹ Gai gilaadeu ne hagadee kii ia i dodo o Ssiibi Gauligi ma delaadeu tala hagadonu ono dagodo. Gai gilaadeu ne hagangadi mee donu olaadeu mouli, gilaadeu tee maatagu donu i delaadeu maakau.

¹² Deenei ai, de langi, malangilangi, ma goodou alodahi e nnoho i kilaa! Aagai e vakaa naa henua i lalo ma tai, go hiidinga de ia hagabaubau laa gu bole ma gu hano iho ai gi goodou, go hiidinga ia gu iloo bolo dono masavaa gu bodobodo.”

¹³ Gai ga gidee huu e de dragon bolo ia gu tili iho gi henua i lalo, gai ia ga doolohi de hine ne hanaua laa tama daane laa.

¹⁴ Aagai gu gaavange gi de hine laa e lua bakau o de igele laumalie, gi maua ai e ia i de lele e hano gee mai i de labodo laa ga hano gi de vao, i dono mommee e diiloo ange ai i e dahi ngadau, ma e lua ngadau, aama e dahi bido ngadau.

¹⁵ Gai de labodo laa ga busi mai vai i lo tono ngudu e hai ai ssaalingaa vai gi dolohia de hine laa, gi dahea ai ia i de mee mmilo laa.

¹⁶ Aagai de gelegele ga bale ange de hine laa; de gelegele ne mahuge age ga holo vai a de dragon ne busi mai laa i lo tono ngudu.

¹⁷ Gai de dragon gu lili mmao i de hine laa, gai ia ga hano ga hebagi ange gi dangada e doe i dono hagadiilinga, ma gilaadeu e daohia muna a de Maadua ma de daalaa hagadonu dagodo o Iesu.

¹⁸ Gai de dragon ne duu i honga de gelegele i gaogao tai.