Revelation 10 - De Beebaa Dabu

Tangada de langi ma de beebaa mulo damaa mee

¹ Gai au ne gidee ange hogi dahi dangada de langi mmahi e hano iho mai i de langi. Ia e gahu i denga hagausinga, gai honga dono biho iai dahi umada, luoono mada e maalama bei de laa, gai luoono vae e bei denga duludulu e ula ai laa de ahi.

² Gai ia e daohi dahi damaa beebaa mulo i dono lima, gai de beebaa laa e mahuge. Dono vae madau e duu i honga tai, gai dono vae masui i honga de henua.

³ Gai ia ne basa i de leo laumalie, bei de leo o de laiono e goo laa. De masavaa huu oona ne basa ai, gai e hidu hatuli gu babaa.

⁴ Gai de masavaa o denga hatuli laa ne babaa ai, gai au ga hai e sisi muna laa; aagai au gu langona dahi leo mai i de langi e hai mai, “Aude daalaa mee a denga hatuli e hidu gu tala laa, gai e dee sisi hogi e daohi.”

⁵ Gai tangada de langi aagu ne gidee laa e duu i honga tai ma honga de henua, ne haalo dono lima madau gi de langi,

⁶ ga hagatoo donu i de ingoo o de ia e mouli laa ga hano ai e dee ngado mai, go de ia ne haia de langi ma mee alodahi iai, ma henua i lalo ma mee alodahi iai, ma tai ma mee alodahi i ono lodo, ga hagadaba, “Gu odi de masavaa!

⁷ Aagai laangi naa huu a togohidu dangada de langi e ili ai dana trumpet, gai mee a de Maadua e dee iloo laa e hagassula donu, bei dana hai gu hagaago ange ai gi ono dangada hai hegau go denga pelaabisi.”

⁸ Gai de leo aagu ne langona laa e humai i de langi i mua, ne basa mai ange hogi gi de au, ga hai mai, “Hannoo gaavee de beebaa mulo e hhuge laa ma e dagodo i lo te lima o tangada de langi e duu laa i honga tai ma honga de henua.”

⁹ Gai au ne hano gi daho tangada de langi laa ga hai ange ia gi gaamai de beebaa laa, gai ia ne hai mai, “Gaavee de beebaa nei gaina; gai e hai naa ga mmala lo too dinae, gai e maimai bei denga hooni i de masavaa aau e maamaa ai i lo too ngudu.”

¹⁰ Gai au ne kave de beebaa mulo damaa mee laa i daho tangada de langi ga gai; gai e maimai bei denga hooni i de masavaa aagu e maamaa ai i lo togu ngudu, aagai dua huu dagu holo mee laa, gai gu hai ga mmala lo togu dinae.

¹¹ Gai gilaadeu ne tala mai hogi gi de au, “Basa pelaabisi daalaa dagodo o denga huaadangada soa, ma huaahenua, ma dangada e pasa i denga hagadaagangaa muna, aama denga hodooligi.”