Psalm 98 - De Beebaa Dabu

Se Psalm

¹ Daahili ange gi Tagi Maolunga i taahili hoou, i hiidinga o ana hegau hagalele mouli gu hai; dono lima madau ma dono lima dabu gu hai ma gu kii ia.

² Tagi Maolunga gu hagaago mai dana hagaola, ma de hagaago ange gi denga huaahenua dono heohi.

³ Ia tee ngalo donu dono abodonu, ma de hai hegau i de mee abodonu ange gi de gau Israel. Henua i lalo alodahi gu gidee e gilaadeu de kii o taadeu Maadua.

⁴ Henua i lalo alodahi, hevaalogi duuhia Tagi Maolunga; malangilangi, daahili ma de hagadangidangi!

⁵ Hagadangidangi ma de daahili ange gi Tagi Maolunga; hagadangidangi i de harp ma de daahili.

⁶ Ilihia denga trumpet ma denga hanga manu, gai malangilangi i mada i mua o de Hodooligi, go Tagi Maolunga.

⁷ Tai ma mee alodahi i ono lodo gi haganngolo, henua i lalo ma dangada alodahi e nnoho ai.

⁸ Denga saalingaa vai gi baabaa olaadeu lima, gai denga mounga alodahi gi daahili i de malangilangi,

⁹ i mada i mua o Tagi Maolunga, go hiidinga ia e humai naa e hagamodu muna o henua i lalo. Ia e hagamodu muna o henua i lalo i de heohi, ma de hagahedae dangada.