Psalm 96 - De Beebaa Dabu

¹ Daahili ange gi Tagi Maolunga i taahili hoou; henua i lalo alodahi, daahili ange gi Tagi Maolunga.

² Daahili ange gi Tagi Maolunga, hagadegi ina dono ingoo; hagadele ina dagodo o dana hagaola i laangi alodahi.

³ Daalaa dagodo o dono mahamaha i magavaa o denga huaahenua, aama ana hegau hagalele mouli i magavaa o dangada alodahi.

⁴ Tagi Maolunga e maolunga mmao, gai e heohi taadeu tuhi ia; gai gi kii ange taadeu maatagu i de ia, i denga maadua alodahi.

⁵ Go hiidinga maadua alodahi o denga huaahenua ni ngadi diinonga, aagai go Tagi Maolunga ne haia de langi.

⁶ De mahamaha ma ssauaa i ono mada i mua; de mmahi ma de mahamaha e hhao dono mommee dabu.

⁷ Huaabodu o denga huaadangada, goodou duuhia Tagi Maolunga, goodou duuhia de mahamaha o Tagi Maolunga ma dono mmahi.

⁸ Duuhia Tagi Maolunga i de mahamaha o dono ingoo, gai gaamai dahi sigidaumaha loomai ai gi lodo ono buibui.

⁹ Daumaha ange gi Tagi Maolunga i malo dabu. Henua i lalo alodahi, goodou gi bolebole i ono mada i mua.

¹⁰ Hai ange gi denga huaahenua, “Go Tagi Maolunga tagi.” Henua i lalo gu hagaduu ma gu makaga, gai e dee maua naa donu gi baguu; ia e hagamodu naa muna o dangada i de heohi.

¹¹ De langi gi malangilangi, henua i lalo gi lodo danuaa; tai ma mee alodahi i ono lodo gi hagangolo;

¹² denga duu malaelae ma mee alodahi iai gi malangilangi! Denga manu ssomo alodahi i lodo henua gi daahili i de malangilangi

¹³ i mada luu mada o Tagi Maolunga, go hiidinga ia e humai naa, ia e humai naa e hagamodu muna o henua i lalo. Ia e hagamodu naa muna o henua i lalo i de heohi, gai e hagamodu muna o dangada i de muna abodonu.