Psalm 92 - De Beebaa Dabu

Se Psalm. Se daahili e hua i de laangi o Sabbath

¹ Se mee danuaa de tuhi Tagi Maolunga, ma de tuhi doo ingoo i taahili, de Ia Maolunga Mmao laa,

² ma de tala hagadanuaa dagodo o doo abodonu i taiao, aama dagodo o doo hai hegau i de mee abodonu i de boo,

³ ma de hagadangidangi i de lute ma de harp aama taahili ga hagadangidangi i de lyre.

⁴ Tagi Maolunga, koe gu hai au gi malangilangi i au hegau, deelaa ai, au e daahili i dogu malangilangi i au hegau.

⁵ Tagi Maolunga, au hegau e maolunga mmao, gai au maanadu e gelo mmao!

⁶ Tangada lodo senga e dee iloo mee nei, tangada senga e dee donu ange aagena,

⁷ gai ga ssomo age naa donu de gau baubau bei denga helii, gai alodahi e haia de baubau e hagadagadaga age, gai gilaadeu e daa naa ga maakau ga hano ai.

⁸ Aagai koe, Tagi Maolunga, e hagaamua naa ga hano ai.

⁹ Tagi Maolunga, galo ange diiloo oo hagadaumee; tilo, oo hagadaumee e maakau naa donu; gai gilaadeu alodahi e haia de baubau e mavaevae saele naa.

¹⁰ Gai koe gu hai au gi mmahi bei de manu aada; koe gu hagasulu au i de lolo hoou.

¹¹ Au gu gidee de hagadee kii ina o ogu hagadaumee; gai au gu langona de maakulu o de gau baubau e hebagi mai gi de au.

¹² Tangada heohi e bei de nui somo danuaa, gai ia e somo bei dahi cedar o Lebanon.

¹³ Gilaadeu e doo i lo te hale o Tagi Maolunga, gilaadeu e ssomo danuaa i lodo buibui o taadeu Maadua.

¹⁴ Gilaadeu e duudagi naa donu huu de hhua i de masavaa olaadeu gu madumaatua ai, gilaadeu e duudagi naa donu huu de lau kohu ma de ssomo danuaa,

¹⁵ e hagaago mai ai bolo Tagi Maolunga e heohi; go ia dogu baba makaga, gai e deai donu se baubau daudahi i ono lodo.