Psalm 91 - De Beebaa Dabu

¹ Tangada e mmuni i lo te buibui a de Ia Maolunga Mmao laa, ma de noho i lalo de malu o de Ia Mmahi Mmao laa,

² e maua i de hai ange gi Tagi Maolunga, “Go koe dogu buibui ma dogu hale hagaloosi makaga, ma dogu Maadua, au e hagadonusia goe.”

³ Ia e hagaola naa goe mai i hai ngadaa e dee gidee laa ma mai i de mee hagamaakau.

⁴ Ia e haoli naa goe i lalo ono hulu manu ma de buibui goe i lalo luoono bakau; dono hai hegau i de muna abodonu go doo mee hungihungi ma doo buibui.

⁵ Gai koe e dee madagu naa donu i de mee hagamaatagu i de boo, ma tao o de mee hholu e tili laa i de laangi,

⁶ aabe go de mee hagamaakau e hano saele laa i lo te gohu, aama de mee e daia dangada ga maakau i de odea.

⁷ E mano naa dangada e maakau i oo gaogao, gai e dahisemada e maakau i doo baasi madau, aagai de magau e dee baa naa donu gi de goe.

⁸ Koe e galo ange naa donu huu ga tilo de hagaduasala o de gau baubau.

⁹ Noo koe e hai Tagi Maolunga go doo buibui, gai de Ia Maolunga Mmao laa go doo mommee e nnoho ai;

¹⁰ gai e deai naa donu se baubau e baa i de goe, aabe se mee hagamaakau e humai gi doo mommee noho.

¹¹ Gai ia e tala ange naa gi ono dangada de langi oo dagodo, gai gilaadeu ga hagaloosi adu ai goe i mommee alodahi.

¹² Gai gilaadeu ga sigo ai goe i olaadeu lima, gi dee duugia ai doo vae i dahi hadu.

¹³ Koe e dagadagahi naa de laiono ma de labodo, ma de laiono mmahi aama de labodo hagammau gi lalo oodou vae.

¹⁴ ⌊E hagadaba de Maadua,⌋ “Go hiidinga ia e aloha i de au, au e hagaola naa ia; Au e buibui naa ia, i hiidinga ia e iloo ogu dagodo.

¹⁵ Au e basa ange naa gi de ia, i de masavaa aana e hagahi mai ai au; au e noho naa i ono daha i de masavaa hai ngadaa, gai au e hagaola naa ia ma de hagadubu ia.

¹⁶ Au e hagamanuuia naa ia i de mouli daulooloa, ma de hagaago ange dagu hai e hagaola ai ia.”