Psalm 9 - De Beebaa Dabu

Ange gi tagi o taahili; e hua i de leo o Muth Labben . Se Psalm nii David

¹ Tagi Maolunga, au e tuhi goe i ogu lodo alodahi, ma de tala dagodo o au hegau hagalele mouli.

² Au e malangilangi ma de tuhi goe; de Ia Maolunga Mmao laa, au e daahili tuhi doo ingoo.

³ Ogu hagadaumee gu saavini ma gu hulo; gilaadeu gu baakuu ma gu maakau i mada luoo mada.

⁴ Gai koe gu hagamodu bolo niiogu tonu; koe gu noho i honga doo nohoanga e hagamodu ai muna i de heohi.

⁵ Koe gu hagasee denga huaahenua, ma de daa gi maakau de gau baubau; koe gu hai gi dee manadua e dangada olaadeu ingoo ga hano ai e dee ngado mai.

⁶ De hagadaumee gu hai gi lilo ga hano ai; koe gu oha olaadeu aduhale, gai dangada gu dee manadua gilaadeu.

⁷ Aagai Tagi Maolunga e dagi ga hano ai; ia ne hagaduu dono nohoanga e hagamodu ai muna.

⁸ Ia e hagamodu naa muna o henua i lalo i de heohi, ma de hagamodu muna i tee hilihili dangada.

⁹ Tagi Maolunga se mommee buibui makaga niiolaadeu e duasala, gai se mommee buibui makaga i de masavaa hai ngadaa.

¹⁰ Gilaadeu e iloo doo ingoo e hagadonusia goe; Tagi Maolunga, koe tee tili donu gilaadeu e saalaa goe.

¹¹ Daahili duuhia Tagi Maolunga, e noho laa i dono nohoanga i Zion! Daalaa ange gi denga huaadangada dagodo o ana hegau!

¹² Go hiidinga de ia e suuia ange de baubau e manadua; ia e dee ngalo donu de tangi o dangada gu vaivai haia.

¹³ Tagi Maolunga, galo mai diiloo de hagaduasala a ogu hagadaumee au! Abodonu mai gi de au ma gi hagaola ina mai au i de mommee o de magau,

¹⁴ gai au ga tala tuhi ai goe i denga haitoga o tamaa hine o Zion, ma de malangilangi i kilaa i dau hagaola mai au.

¹⁵ Denga huaahenua gu too ange gi lo te geelinga alaadeu ne geli; olaadeu vae gu llave i de galauna alaadeu ne dugu hagammuni.

¹⁶ Tagi Maolunga gu hagaago mai ono dagodo, i dana hagamodu muna i de heohi; de gau baubau gu boogia mai i alaadeu hegau baubau. Higgaion. Selah

¹⁷ Tangada baubau e ahe ange gi de mommee o de gau maakau, madali denga huaahenua ne ngalo laa de Maadua.

¹⁸ Aagai ⌊de Maadua⌋ e dee ngalo donu gilaadeu e duasala i masavaa alodahi; gai de tali hagalodolodo a de gau hagaau aloha e dee lilo donu ga hano ai.

¹⁹ Tagi Maolunga, hidi age, aude dugua ange gi kii dangada; gai hagamodu ina muna o denga huaahenua i oo mada i mua!

²⁰ Tagi Maolunga, hagamaatagu ina gilaadeu! Haia gi iloo e denga huaahenua bolo gilaadeu ni dangada donu huu! Selah