Psalm 88 - De Beebaa Dabu

Se daahili. Se Psalm nii de aamuli o Korah . Ange gi tagi o taahili; e hua bei de leo o de Mahalath leannoth . Se Maskil nii Heman, ia se daane de aamuli o Ezrah

¹ Tagi Maolunga, dogu Maadua, go koe dogu hagaola; au e hagahi adu i de laangi ma de boo.

² Haia gi dae age dagu dalodalo gi de goe, gai huli mai hagalaangona dagu dangidangi.

³ I hiidinga au gu duasala mmao, gai au gu baa ange donu gi de magau.

⁴ Au gu bei gilaadeu e loiho laa gi lo te geelonga o de magau; au gu bei tangada gu deai laa ono mahi.

⁵ Au gu bei tangada gu dagodo laa i magavaa o de gau maakau, ma tangada magau gu dagodo i lo te daanunga, gai se dangada niiau gu dee manadua, gai koe gu dee bale ange ia.

⁶ Koe gu dugu au i lo te geelonga maolalo hugadoo, go de mommee gohu mmao ma de gelo.

⁷ Au gu langona iho de daemaha o doo bole, gai koe gu hagaabulu au i au beau alodahi. Selah

⁸ Koe gu hai ogu soa gi dee aanga mai gi de au; koe gu hai au gi se mee niiolaadeu e kino ai. Au gu bonodia ange ma gu dee maua i de sao mai;

⁹ luoogu mada gu baageaa i dogu duasala. Tagi Maolunga, au e hagahi adu goe i laangi alodahi; au e haalo adu dogu lima gi de goe.

¹⁰ E aha, koe e hagaago ange au hegau hagalele mouli gi de gau maakau? E aha, de gau maakau e hiihidi age laa ga tuhi goe? Selah

¹¹ E aha, e maua e dahi i de tala dagodo o doo abodonu i lo te daanunga, aabe go doo hai hegau i de muna abodonu i Abaddon?

¹² E maua gi iloo au hegau hagalele mouli i de mommee gohu, aabe go doo heohi i de henua o de gau ngalongalo?

¹³ Tagi Maolunga, au e dangi adu gi de goe; au e dalodalo adu gi de goe i taiao.

¹⁴ Tagi Maolunga, gu aha goe gu tili ai naa ngau? Gai gu aha gu hagammuni ai naa luoo mada i de au?

¹⁵ Mai i dogu gauligi gai au ne duasala ma de dai magau, au ne duu ange gi au mee hagamaatagu gai gu deai sagu tali.

¹⁶ Koe ne haoli au i doo bole; au mee hagamaatagu gu hebagi mai gi de au.

¹⁷ Gilaadeu e haoli au bei dagodo o tolona mai i taiao ga boo ai; gilaadeu gu hagaabulu au.

¹⁸ Koe gu hai ogu soa ma ogu soa hagaaloha gi dee aanga mai gi de au; go de gohu donu huu dogu soa.