Psalm 87 - De Beebaa Dabu

Se Psalm nii de aamuli o Korah . Se daahili

¹ De aduhale aana ne hai e duu i honga de mounga dabu;

² Tagi Maolunga e malangilangi ange i de aduhale go Zion i denga mommee alodahi e nnoho ai dangada o Jacob.

³ De aduhale o de Maadua, gu lagolago mee gu tala hagadanuaa ai oo dagodo! Selah

⁴ Au e dau Rahab ma Babylon madali gilaadeu e iloo au; ma Philistia ma Tyre, aama Ethiopia; ma de hagadaba, “Ia e dau bolo ne haanau i Zion.”

⁵ Gai dangada e hagataba naa i dagodo o Zion, “Tangada nei ma tangada laa ne haanau i lo te aduhale;” go de Ia Maolunga Mmao laa e hagaduulia gi makaga de aduhale laa.

⁶ Tagi Maolunga e sisi ma de daohi ingoo o dangada: “Tangada nei ne haanau i Zion.” Selah

⁷ De gau daahili ma gilaadeu e aanu e hagataba, “Ogu saalingaa vai alodahi i oo daha.”