Psalm 86 - De Beebaa Dabu

Se dalodalo nii David

¹ Tagi Maolunga, hagalaangona mage basa mai gi de au, go hiidinga au e daemaha ma de duasala.

² Buibuia dogu mouli, go hiidinga au e hai hegau adu gi de goe i de muna abodonu. Go koe dogu Maadua, hagaola ina doo dangada hai hegau; au e hagadonusia goe.

³ Dogu Ia Aamua, abodonu mai gi de au, i hiidinga au e dangi adu i taiao ga boo ai.

⁴ Haia gi malangilangi doo dangada hai hegau, i hiidinga au e dalodalo adu gi de goe, de Ia Aamua.

⁵ Dogu Ia Aamua, koe e danuaa gai e degi, gai e abodonu ange mmao gi dangada alodahi e hagahia goe.

⁶ Tagi Maolunga, anga mai gi dagu dalodalo; gai hagalaangona dogu dangidangi adu i de abodonu.

⁷ Au e hagahi goe i laangi oogu e duasala ai, gai koe e basa mai gi de au.

⁸ Dogu Ia Aamua, e deai ange donu i magavaa o denga maadua e bei oo dagodo, e deai ange hogi hegau e bei dagodo o au hegau.

⁹ Denga huaahenua alodahi aau ne hai e loomai naa ga ino gi lalo ga daumaha adu gi de goe, dogu Ia Aamua, aama de hagamahamaha doo ingoo.

¹⁰ I hiidinga koe e maolunga mmao gai e hai hegau hagalele mouli, go koe donu huu de Maadua abodonu.

¹¹ Tagi Maolunga, agoagona mai au i oo lodo, gai au ga seesee ai i de muna abodonu; haia gi madagu au i de goe i ogu lodo alodahi.

¹² Dogu Ia Aamua, dogu Maadua, au e tuhi goe i ogu lodo alodahi, gai au e hagamahamaha doo ingoo ga hano ai.

¹³ Go hiidinga oo abodonu mai gi de au e laumalie mmao; koe gu hagaola mai au i lo te mommee gelo iai de gau maakau.

¹⁴ De Maadua, de gau hagamaolunga gu hebagi mai gi de au; dahi hagabuulinga daa dangada e ssala hogi au e daa gi magau, gilaadeu e dee anga adu donu gi de goe.

¹⁵ Aagai koe, dogu Ia Aamua, se Maadua e lodo aloha ma de degi, koe e dee moolau de lili gai e lodo aloha mmao, ma de hai hegau i de muna abodonu.

¹⁶ Huli mai ma gi lodo aloha mai gi de au; hagammahi ina doo dangada hai hegau i oo mahi, gai hagaola ina tama daane a doo hahine hai hegau.

¹⁷ Hagaagona mai gi de au de hagailonga o doo abodonu, gi dookaa ai gilaadeu e kino i de au, i de masavaa alaadeu e gidee ai, i hiidinga go koe, Tagi Maolunga, ne balea mai au ma de hagaaneane ogu lodo.