Psalm 85 - De Beebaa Dabu

Ange gi tagi o taahili. Se Psalm nii de aamuli o Korah

¹ Tagi Maolunga, koe gu abodonu ange gi doo henua; koe gu hagaahe ange de manuuia o Jacob.

² Koe gu degi ange gi baubau o oo dangada; ma de haoli olaadeu haisala alodahi. Selah

³ Koe ne tuu doo bole alodahi gai ne huli gee mai i doo lili laumalie.

⁴ De Maadua, demaadeu Ia Hagaola, hagaola ina gimaadeu, gai hagahelui ina doo dee malangilangi i gimaadeu!

⁵ E aha, koe ga lili naa i gimaadeu ga hano ai? Koe ga duudagi naa doo bole i denga atangada alodahi?

⁶ E aha, koe e dee ahe ange e hagaola mai gimaadeu, gi malangilangi ai oo dangada i oo hiidinga?

⁷ Tagi Maolunga, koe gi abodonu mai gi gimaadeu, gai hagaola ina gimaadeu.

⁸ Au e hagallongo muna a de Maadua, Tagi Maolunga e tala; ia e hagatoo donu ange gi ono dangada de nnoho paba, go ono dangada dabu, aagai gilaadeu gi dee aahe ange gi hai hegau i de llodo ssenga.

⁹ Ni muna abodonu, dana hagaola e dee mmao gee donu i gilaadeu e maatagu i de ia, gi dagodo ai de mahamaha o Tagi Maolunga i honga taadeu henua.

¹⁰ De aloha ma de hai hegau i de muna abodonu gu hedae ange; gai de heohi ma de baba gu hagadau oso.

¹¹ De hai hegau i de mee abodonu e hanage i henua i lalo, gai de heohi e galo iho i de langi.

¹² Tagi Maolunga e gaamai de mee danuaa, gai demaadeu gelegele e hhua lagolago naa.

¹³ De heohi e hano i ono mada i mua, e hagadabena ai dono haiava e seesee ai.