Psalm 84 - De Beebaa Dabu

Ange gi tagi o taahili; e hua bei de leo o de Gittith . Se Psalm nii de aamuli o Korah

¹ Tagi o denga hagabuulinga hebagi, ga dae laa de mahamaha o doo mommee noho!

² Au e hinangalosaa aama de lodo mmao e tilo de buibui o de hale o Tagi Maolunga; ogu lodo ma dogu ngudu e daahili i de malangilangi ange gi de Maadua e mouli laa.

³ De sparrow e dahi ono hale, gai de swallow e dahi hoohanga, e dugu ai ana dama, i gaogao au mommee o ssigidaumaha, Tagi o denga hagabuulinga hebagi, dogu Hodooligi ma dogu Maadua.

⁴ E manuuia gilaadeu e nnoho i doo hale, gilaadeu e tuhi naa goe ga hano ai. Selah

⁵ E manuuia gilaadeu aau e hagammahi ina, gai olaadeu lodo gu paba ange e hulo gi Zion.

⁶ De masavaa olaadeu e hulo ai laa lo te geelonga o Baca, gai gilaadeu ne hai kilaa ga se mommee iai denga saalingaa vai; de langi e humai laa i mua e hhao kilaa ga honu i vai.

⁷ Gilaadeu e hagadagadaga ange de mmahi; gilaadeu e tuu naa i mada i mua o de Maadua i Zion.

⁸ Tagi Maolunga, de Maadua o denga hagabuulinga hebagi, hagalaangona dagu dalodalo; de Maadua o Jacob, hagalaangona! Selah

⁹ De Maadua, galo iho diiloo demaadeu mee hungihungi; gai abodonu ange de ia aau gu hagadabu i de lolo.

¹⁰ Dahi laangi i lo too hale e danuaa ange i e mano laangi i dahi mommee ange. Au e kii ange dogu lodo gi se dangada hagaloosi i de haitoga o de hale o dogu Maadua i dogu noho i de hale o tangada baubau.

¹¹ Go hiidinga Tagi Maolunga de Maadua e bei de laa ma de mee hungihungi; ia e abodonu mai aama de hagadubu au. Ia e dee daohi donu dahi mee danuaa daudahi i gilaadeu e seesee i de heohi.

¹² Tagi o denga hagabuulinga hebagi, e manuuia tangada e hagadonusia goe!