Psalm 83 - De Beebaa Dabu

Se daahili. Se Psalm nii Asaph

¹ De Maadua, koe gi dee noho donu huu gi dee muu; de Maadua, aude noho donu huu, aabe gi noho gi dee muu.

² Galo ange diiloo, oo hagadaumee gu hiihidi age e hebagi; gai gilaadeu e kino i de goe gu daangage age olaadeu biho.

³ Gilaadeu gu hai hanu hagatau e hai baasi ange ai gi oo dangada; gilaadeu gu hagasaele de hai baasi ange ai gi oo dangada hagamogomogo.

⁴ Gilaadeu e hagataba, “Loomai, gidaadeu ga daa gi odi de huaahenua laa; gai gi dee manadua ai de ingoo o Israel.”

⁵ Gilaadeu gu buni e hai dahi hagatau; gilaadeu gu hai dahi hagaheloongoi hai baasi adu ai gi de goe:

⁶ de gau Edom ma dangada o Ishmael, ma de gau Moab, aama dangada o Hagar,

⁷ ma de gau Gebal, ma de gau Ammon, ma de gau Amalek, ma de gau Philistia aama dangada o Tyre;

⁸ de gau Assyria gu dau ange hogi gi gilaadeu; gai go gilaadeu e balea ange de aamuli o Lot. Selah

⁹ Haia gilaadeu gi bei dagodo o de gau Midian, ma Sisera aama Jabin i gaogao ssaalingaa vai go Kishon,

¹⁰ go dangada ne maakau i Endor, olaadeu angaanga gu bei denga duudae pobo i honga de gelegele.

¹¹ Haia olaadeu dangada aamua gi bei dagodo o Oreb ma Zeeb, gai olaadeu dagi gu bei dagodo o Zebah ma Zalmunna,

¹² gilaadeu ne hagataba, “Gidaadeu ga kave de henua o de Maadua e henua ai.”

¹³ Dogu Maadua, ilihia saele gilaadeu bei denga helii, ma denga gili grain e gaavee gee laa i de madangi.

¹⁴ Haia gilaadeu gi bei de mommee e ula laa i lodo henua, gai gi bei de ahi e haulasia denga mounga,

¹⁵ gai koe gi ilihia gilaadeu i de madangi ssau gai gi hagamaatagu ina gilaadeu i de madangi mmahi!

¹⁶ Haia gi dookaa gilaadeu, gai gilaadeu ga ssala ai goe, Tagi Maolunga.

¹⁷ Gai gilaadeu gi dookaa ma de maatagu ga hano ai; gai gilaadeu gi maakau i delaadeu dookaa.

¹⁸ Gai gilaadeu gi iloo koe, go de ia e hagaingoo ange laa go Iahweh, gai go koe donu huu de Ia Maolunga Mmao i henua i lalo alodahi.