Psalm 81 - De Beebaa Dabu

Ange gi tagi o taahili; e hua bei de leo o de Gittith . Se Psalm nii Asaph

¹ Daahili ange gi de Maadua, odaadeu mahi, i de malangilangi; hevaalogi duuhia de Maadua o Jacob i de malangilangi!

² Langia dahi daahili, daalea de tambourine, ma de hagadangidangi i de lyre aama de harp.

³ Ilihia de hanga manu i taonga o de duu de maasina i dai, ma de honu de maasina, ma de laangi o taadeu daonga.

⁴ I hiidinga se hainga gu hagasauaa ange gi Israel, gai ni muna nii de Maadua o Jacob.

⁵ Ia ne hagasauaa ange gi Joseph de mee nei, i de masavaa oona ne hano ai ga hebagi ange gi Egypt, go de mommee amaadeu ne langona ai hanu muna amaadeu tigi iloo laa.

⁶ ⌊De Maadua ne hagadaba,⌋ “Au ne aau de mee daemaha i honga dono eu; ma de kave gee de gede daemaha i lodo olaadeu lima.

⁷ Koe ne hagahi mai au i doo duasala, gai au ne hagaola goe; au ne basa adu gi de goe mai i lo te hagausinga o de hatuli, gai au ne hagatale oo dagodo i de vai go Meribah. Selah

⁸ Ogu dangada, nnoho mai gai au ga agoago adu goodou; de gau Israel, mee naa goodou gi hagallongo mai gi de au!

⁹ Aude dugua dahi diinonga daudahi i oo daha, aude daumaha ange gi dahi diinonga gee.

¹⁰ Go au Tagi Maolunga doo Maadua, ne hagassao ina mai goe i de henua go Egypt. Haangaa doo ngudu, gai au ga hhao mai.

¹¹ Aagai ogu dangada tee hagallongo i agu muna; de gau Israel tee daudali mai i de au.

¹² Deelaa ai, au e dugu ange naa gilaadeu gi daudali i alaadeu hagasaele hagamaolunga.

¹³ Mee naa gi hagallongo mai ogu dangada gi de au, gai Israel gi daudali i ogu lodo!

¹⁴ E moolau naa donu dagu hagadee kii olaadeu hagadaumee, ma de hebagi ange gi dangada e kino i gilaadeu.

¹⁵ Dangada e kino i Tagi Maolunga e maatagu naa i de ia, gai delaadeu hagaduasala e dee ngado mai donu.

¹⁶ Aagai au e haangai adu naa goe i denga grain danuaa hugadoo, ma de hai gi bosu goe i denga hooni o lo te baba.”