Psalm 8 - De Beebaa Dabu

Ange gi tagi o taahili; gai e hua bei de leo o de Gittith . Se Psalm nii David

¹ Tagi Maolunga, demaadeu Ia Aamua, doo ingoo e maolunga mmao i henua i lalo alodahi! Koe gu hai doo mahamaha gi maolunga ange i de langi i lunga.

² Koe gu hai denga gauligi vaaligiligi ma denga gaagaa gi daalaa dagodo oo mmahi, i hiidinga o dangada e kino i de goe, gi dee mmuu ai oo hagadaumee ma dangada e suuia ange de baubau.

³ De masavaa aagu e tilo ai de langi, go hegau aau ne hai i luoo lima, de maasina ma denga heduu aau gu dugu i olaadeu duulanga,

⁴ ⌊gai au ne ssili,⌋ “Se aha tangada, gai koe ga anga ange ai gi de ia? Gai se aha tama a dangada, gai koe ga abodonu ange ai gi de ia?”

⁵ Koe ne hai ia gi damaa maolalo mai ange i de gau de langi, gai koe ne hagahau ia i de mahamaha ma de hagadubu.

⁶ Koe ne hai ia gi dagina mee alodahi aau ne hai, ma de dugu mee alodahi i lalo luoono vae:

⁷ go denga hagabuulingaa ssiibi ma kaau alodahi, ma manu lodo henua;

⁸ ma denga manu llele i lo te moana i lunga, ma denga mamu i lo te dai, aama mee alodahi e mouli i lausedi.

⁹ Tagi Maolunga, demaadeu Ia Aamua, doo ingoo e maolunga mmao i henua i lalo alodahi!