Psalm 76 - De Beebaa Dabu

Ange gi tagi o taahili; e hua madali denga mee hagadangidangi iai daula. Se Psalm nii Asaph . Se daahili

¹ De henua o Judah e iloo de Maadua, dono ingoo e maolunga i Israel.

² Dono hale gaainga e duu i Salem, gai dono mommee noho i Zion.

³ Ia gu hadihadi denga dao ula o de hagadaumee ma de mee hungihungi, ma de gadilaasa, aama denga goloa o de hebagi. Selah

⁴ Koe e mahamaha mmao, gai e maolunga ange i denga mounga iai manu e maua i de gai.

⁵ Denga daane hebagi mmahi gu gaavee olaadeu goloa hebagi, gai gilaadeu gu sseni i sseni o de gau maakau; denga daane aaboo i de hebagi gu dee maua i de langa age olaadeu lima.

⁶ De Maadua o Jacob, doo bole gu daa de hoosa ma tangada e gage ai.

⁷ Aagai go koe donu huu e heohi de maatagu ai o dangada! Goai e maua i de duu i mada luoo mada i de masavaa oou e lili ai?

⁸ Koe e hagamodu muna mai i de langi; gai henua i lalo e dee mmuu naa i delaadeu maatagu,

⁹ de Maadua, i de masavaa aau ne hagamodu ai muna, ma de hagaola gilaadeu alodahi e hagaduasala ina i henua i lalo. Selah

¹⁰ Ni muna abodonu, de llili o dangada e hidi mai ai doo tuhi, gai dangada e ola mai i de lili e dau adu naa gi de goe.

¹¹ Haia au hagatoo donu ange gi Tagi Maolunga doo Maadua gai hagassula ina mee nei; dangada alodahi i henua e paa mai gi gaamai mee ngadi gaavange gi de Ia Hagamaatagu.

¹² Ia e hagamaolalo dagi o de henua, gai denga hodooligi o henua i lalo e maatagu i de ia.