Psalm 75 - De Beebaa Dabu

Ange gi tagi o taahili; e hua i de leo o “Aude oohaa”. Se Psalm nii Asaph . Se daahili

¹ De Maadua, gimaadeu e hagaahe adu de abodonu gi de goe, gimaadeu e hagaahe adu de abodonu, go hiidinga doo ingoo e baa mai donu; dangada e tala dagodo o au hegau hagalele mouli.

² ⌊E hagadaba de Maadua,⌋ “Au gu hagailonga de masavaa aagu e hagamodu ai muna i de heohi.

³ De masavaa o henua i lalo e ngalungalue ai madali dangada iai, gai go au e daohia gi makaga ono duludulu. Selah

⁴ Au e hai ange gi tangada basa hagamaolunga, ‘Aude basa hagamaolunga,’ gai e hai ange gi tangada baubau, ‘Aude hagamaolunga;

⁵ aude hagamaolunga gi hai baasi ange ai gi de langi, aude basa hagamaolunga i de hagamakaga oo lodo.’ ”

⁶ Go hiidinga de hai o tangada ga maolunga e dee humai i dua be go dai, aabe e humai i de vao;

⁷ aagai go de Maadua de ia hagamodu muna, go ia e hagamaolalo ina dahi dangada gai ga hai gi maolunga dahi.

⁸ Tagi Maolunga gu poo dahi ubu uvaini iai ebuebu gai gu hilo danuaa; ia e llingi naa uvaini nei, gai de gau baubau alodahi i henua i lalo e unu naa ga deai se madaua daudahi e doe.

⁹ Aagai au e lodo malangilangi naa ga hano ai, au e daahili naa ga tuhi de Maadua o Jacob.

¹⁰ Au e hai naa donu gi deai mahi o de gau baubau alodahi, aagai au e hai naa gi hagadagadaga age mahi olaadeu e heohi.