Psalm 73 - De Beebaa Dabu

Tolu beebaa (Psalm 73—89)

Se Psalm nii Asaph

¹ Ni muna abodonu, de Maadua e abodonu ange gi Israel, aama ange gi gilaadeu e gilimalali olaadeu lodo.

² Aagai au, luoogu vae ne dai ssege donu, gai ne momo ange huu au gu baguu.

³ Go hiidinga au ne lodo gaiaa ange gi de gau pasa hagamaolunga, i dagu gidee de hagadagadaga age o de gau baubau.

⁴ Gilaadeu e dee gidee naa donu denga hai ngadaa i olaadeu mouli, gai olaadeu angaanga e mmahi ma de pedi.

⁵ Gilaadeu e dee hai ngadaa donu bei dangada ange laa; gai gilaadeu e dee hagaduasala bei de gau ange laa.

⁶ Deelaa ai, de hagamaolunga go de mee dau i olaadeu ua; gai olaadeu malo e kahu ai go de alasala.

⁷ Olaadeu ganomada e hhua i hiidinga delaadeu pedi, gai olaadeu lodo e hoohonu i denga maanadu baubau.

⁸ Gilaadeu e doo mee ma de pasa baubau i dangada; gilaadeu e hagamaatagu dangada i de hagamaolunga.

⁹ Gilaadeu e pasa ma e hai baasi ange gi de langi, gai olaadeu alelo e aheahe saele i henua i lalo.

¹⁰ Deelaa ai, ono dangada e huuhuli ange gi gilaadeu, ma de llodo e unu vai lagolago.

¹¹ Gilaadeu e hagataba, “Dee hee de hai a de Maadua e iloo ai mee nei? E aha, e dahi nei donu iloo mee o de Ia Maolunga Mmao laa?”

¹² Tilo, aanei dagodo o de gau baubau; gilaadeu e duadonu, gai olaadeu goloa e hagadaga ange de lanea.

¹³ Ni muna abodonu, teai donu haigamaiana dagu hai gi gilimalali ogu lodo, ma de daohi luoogu lima gi dee haisala.

¹⁴ Mai i taiao ga boo ai gai au e duasala, gai au e duasala i daiao alodahi.

¹⁵ Noo au e basa bee nei, gai tilo, au gu hagangadi mee de atangada o au dama.

¹⁶ Gai ga maanadu huu au dagodo o de mee nei, gai e hai ngadaa mmao i dogu donu ange aagena,

¹⁷ ga dae ai gi dogu hano gi lo te hale dabu o de Maadua; gai au gu donu ange gi de hagaodi o de gau bee nei.

¹⁸ Ni muna abodonu, koe ne hai gilaadeu gi tuu i de mommee segesege; ma de hai gilaadeu gi too ange gi de magau.

¹⁹ Gai ne daa hagalele donu delaadeu maakau, ma de gaavee gee alodahi i de mee hagamaakau!

²⁰ Gilaadeu e bei de midi e ngalo laa i de alahage o tangada; dogu Ia Aamua, de masavaa oou e hidi age ai, gai koe gi hagangadi mee ina gilaadeu bei dagodo o denga ngadi midi.

²¹ De masavaa oogu ne daemaha ai, ma de mmae ogu lodo,

²² au se dangada senga ma teai agu mee e iloo, bei dagodo o de manu lodo henua i mada luoo mada.

²³ Aagai au e noho i oo daha ga hano ai; koe gi boogia dogu lima madau.

²⁴ Koe e dagina huu au i au muna bale, gai muli mai gai koe ga hagaulu au i mommee mahamaha.

²⁵ E deai ange donu sogu bale i de langi, go koe donu huu! Gai e deai ange donu se mee oogu e lodo ai i henua i lalo, go koe donu huu!

²⁶ Dogu angaanga ma ogu lodo e baageaa naa, aagai go de Maadua e hagammahi ina ogu lodo, go ia dogu duuhanga ga hano ai.

²⁷ Tilo, dangada e hagammao gee i de goe e maakau donu; gai koe e daa gi maakau gilaadeu e hulo gee mai i de goe.

²⁸ Aagai au, e danuaa dogu hagabaa ange gi de Maadua; au gu hai de Ia Aamua go Iahweh go dogu buibui, gai au ga tala ai dagodo o au hegau alodahi.