Psalm 72 - De Beebaa Dabu

Se Psalm nii Solomon

¹ De Maadua, agoagona ange de hodooligi i dau hagamodu muna heohi, gai agoagona ange doo heohi gi dama a de hodooligi.

² Gai ia gi hagamodu ina muna o oo dangada ma de gau hagaaloha i de heohi.

³ Denga mounga gi haia gi nnoho paba dangada, gai denga duuduu gi haia mee nei i de heohi!

⁴ Gai ia gi balea ange gilaadeu e hagaau aloha, ma de hagaola denga gauligi e duasala, aagai gi hagaduasala ina gilaadeu e vaivai haia dangada.

⁵ Gai dangada gi maatagu i de goe i taulooloa de aheahe ange o de laa ga sobo age, ma de maasina, i denga atangada alodahi!

⁶ Ia gi bei dagodo o de langi e hagamaluulu ina laa denga helii, ma vai e hagamaluulu ina laa henua i lalo.

⁷ Gai de mee heohi gi hagadagadaga age i dono masavaa e hodooligi ai, ma de nnoho paba, ga dae ai gi teai se maasina.

⁸ Ia e hodooligi naa mai dahi dai ga dae ai gi tai ange laa, ma mai i ssaalingaa vai go Euphrates ga dae ai gi de bido laa o henua i lalo.

⁹ Gai denga aamuli i lodo henua e ino naa i ono mada i mua, gai ono hagadaumee e gai naa denga gelegele.

¹⁰ Gai denga hodooligi o Tarshish ma denga mommee i tagudai e hagao ange naa taagisese gi de ia; gai denga hodooligi o Sheba ma Seba e gaamai naa denga mee ngadi gaavange gi de ia.

¹¹ Denga hodooligi alodahi gi ino gi lalo i ono mada i mua, denga huaahenua alodahi gi hai hegau ange gi de ia.

¹² Gai ia e hagaola naa gilaadeu e duasala e hagahia ange ia, ma de bale ange tangada hagaau aloha ma tangada e deai sono bale.

¹³ Ia e lodo aloha ange naa gi gilaadeu e baageaa ma de duasala, ma de hagaola gilaadeu e hagaau aloha.

¹⁴ Ia e hagaola gilaadeu mai i tuasala aama de baagava; i hiidinga ia e hagamogomogo olaadeu mouli.

¹⁵ Gi daulooloa dono mouli ai! Gai dangada gi gaavange gi de ia goolo mai i Sheba. Dangada gi dalodalo ange gi de ia i masavaa alodahi, ma de hagadegi ia mai taiao ga boo ai.

¹⁶ Gi lagolago grain i honga de henua; ma de singasinga saele i honga mounga. Gai ono huamanu gi ssomo danuaa bei Lebanon; gai gi soa dangada i lodo aduhale bei denga helii lagolago i honga de henua.

¹⁷ Dono ingoo gi dagodo ga hano ai, gai ono longo gi dele saele i taulooloa de sobo age o de laa. Dangada e manuuia naa i ono hiidinga, gai denga huaahenua alodahi e hagataba naa bolo ia e manuuia.

¹⁸ Hagadegi ina Tagi Maolunga de Maadua, de Maadua o Israel, go ia donu huu e haia hegau hagalele mouli.

¹⁹ Hagadegi ina dono ingoo mahamaha ga hano ai; gai dono ingoo mahamaha gi dele i henua i lalo alodahi. Amen gai Amen!

²⁰ Deenei de hagaodi dalodalo a David, tama daane a Jesse.