Psalm 71 - De Beebaa Dabu

¹ Tagi Maolunga, go koe dogu buibui; koe gi dee hagadogaa ina loo au.

² Hagaola ina mai au ma de hagamouli au i hiidinga koe e heohi; huli mai doo dalinga ma de hagaola mai au.

³ Go koe de baba makaga oogu e buibui ai, go de mommee oogu e maua i de hano aagena i masavaa alodahi; koe gu hagadaba bolo au gi hagaola ina mai au, gai go koe dogu baba ma dogu mommee buibui makaga.

⁴ Dogu Maadua, hagaola ina mai au i tangada alasala, ma mai i lodo lima o de gau baubau ma de alasala.

⁵ Dogu Ia Aamua go Iahweh, go koe dagu tali hagalodolodo; au ne hagadonusia goe mai i dogu gauligi.

⁶ Au ne dau adu gi de goe mai i de masavaa oogu ne haanau ai, gai go koe ne hagasao ina mai au i lo te dinae o dogu dinana. Au e tuhi naa donu huu goe ga hano ai.

⁷ Dogu mouli se hagailonga ange gi dangada soa, aagai go koe dogu mommee buibui makaga.

⁸ Au e hai gi honu dogu ngudu i de tuhi goe, ma de tala dagodo o doo mahamaha i taiao ga boo ai.

⁹ Koe gi dee dilia donu au i de masavaa oogu e madumadua ai, gai koe gi dee huli gee i de au i de masavaa oogu e baageaa ai.

¹⁰ Go hiidinga ogu hagadaumee e pasa i de au; gilaadeu gu hagasaele de hai e daa ai au gi magau

¹¹ ma de hagataba, “De Maadua gu dee anga ange gi de ia; gidaadeu ne doolohi ia ga poo, i hiidinga e deai donu se dangada e hagaola ina ia.”

¹² De Maadua, koe gi dee hagammao gee i de au; dogu Maadua, hagamoolau mai, ma gi balea mai au.

¹³ Haia gi dookaa ma de llilo gilaadeu e hai baasi mai gi de au; haia gi hagangadi mee ina ma teai selaadeu hagadubu.

¹⁴ Aagai au e dee tuu naa donu dagu tali hagalodolodo, ma de hai gi kii ange dagu tuhi goe i masavaa alodahi.

¹⁵ Gai au e tala naa dagodo o doo heohi, dau hagaola i laangi alodahi, go hiidinga au e dee maua donu i de hagahidi ono dagodo.

¹⁶ De Ia Aamua go Iahweh, au e humai naa ga tala au hegau hagalele mouli; au e tala naa dagodo o doo heohi, go doo heohi donu huu.

¹⁷ De Maadua, koe ne agoago mai au i dogu gauligi, gai au goi tala donu huu dagodo o au hegau hagalele mouli.

¹⁸ Gai ga madumadua naa donu au ga sinasinaa dogu biho, dogu Maadua, koe gi dee dilia loo au, ga dae ai gi dagu tala ange dagodo o doo mmahi gi denga atangada alodahi e loomai i muli.

¹⁹ De Maadua, doo heohi e hano ga dae gi lo te langi, go koe donu huu e haia denga hegau nnui, de Maadua, e deai ange donu e bei oo dagodo.

²⁰ Koe ne hai gi gidee e au denga hai ngadaa lagolago ma de baubau, gai koe e ahe ange naa ga hagaola dogu mouli, ma de hagaahe age au i de mommee o de gau maakau.

²¹ Koe e hai gi laumalie dogu hagadubu, ma de ahe ange ga hagaaneane ogu lodo.

²² Dogu Maadua, au e tuhi goe i de harp, i hiidinga koe e hai hegau i de muna abodonu; au e daahili ma de tuhi goe i de lyre, de Ia Dabu o Israel.

²³ Au e oo naa i dogu malangilangi, i de masavaa oogu e daahili ai ga tuhi goe; dogu hagasaalunga aau ne hagaola laa e tuhi hogi goe.

²⁴ Gai au e tala naa dagodo o au hegau heohi i taiao ga boo ai, go hiidinga gilaadeu e nnoho laa e daa au gi magau gu hagadookaa ina ma de hagangadi mee ina.