Psalm 69 - De Beebaa Dabu

Ange gi tagi o taahili; e hua i de leo o “Denga lilii”. Se Psalm nii David

¹ De Maadua, hagaola ina mai au, go hiidinga denga vai gu dae age loo gi dogu ua.

² Au gu dai lilo donu gi lo te bela, go de mommee e deai se mommee e tuu ange luoogu vae aagena. Au gu doo gi lo te moana gelo, denga vai gu haoli au.

³ Au gu dalea mmao i de dangidangi i de bale; dogu holomanga gu mmasa gee. Luoogu mada gu daalea i de dagitilo de humai o dogu Maadua.

⁴ Gilaadeu e kino i de au, gai e deai donu hiidinga, e lagolago ange i ngaangaaulu o dogu biho; ogu hagadaumee e hadu muna i de au, gai e soa gilaadeu e hagatale de daa au gi magau. Gai gilaadeu e hai au gi hagaahe ange mee aagu tee gaiaa.

⁵ De Maadua, koe e iloo dagodo o dogu lodo senga; au e dee maua i de hagammuni ogu haisala i de goe.

⁶ De Ia Aamua, Tagi o denga hagabuulinga hebagi, koe gi dee hagadookaa ina gilaadeu e hagadonusia goe i ogu hiidinga. De Maadua o Israel, koe gi dee hagadookaa ina gilaadeu e saalaa goe i ogu hiidinga.

⁷ I hiidinga au gu hagadogaa ina i oo hiidinga, gai au gu haoli luoogu mada i hiidinga de kona dogu dogaa.

⁸ Au gu bei tangada henua gee i daho ogu daina, gai se dangada henua gee i daho dama a dogu dinana.

⁹ Ogu lodo gu honu i de lodo gaiaa i hiidinga o doo hale; gilaadeu e hagadogaa ina goe e hagadogaa donu hogi au.

¹⁰ De masavaa oogu e dangi ai ma de hagahiigai, gai au ne hagadogaa ina.

¹¹ De masavaa oogu ne gahu ai i malo daladala, gai gilaadeu ne hakadanga i de au.

¹² Dangada i gaogao de haitoga o de buibui e pasa i de au, gai de gau ssenga gu hadu dahi daahili i de au.

¹³ Aagai au e dalodalo adu gi de goe, Tagi Maolunga, i de masavaa o doo abodonu; basa mai gi dagu dalodalo i hiidinga doo abodonu laumalie, ma doo hai hegau i de mee abodonu.

¹⁴ Daangia age au i lo te bela pigi oogu gu dai danumia ai; hagaola ina mai au i gilaadeu e kino i de au, ma mai i lo te moana gelo.

¹⁵ Koe gi dee dugua ange tolona gi haia gi abulu au, aabe gi haia de moana gelo gi haolia iho au, aabe gi haolia ange au i lo te daanunga.

¹⁶ Tagi Maolunga, basa mai gi dagu dalodalo i hiidinga doo lodo aloha; anga mai gi de au, i hiidinga doo abodonu e laumalie mmao.

¹⁷ Aude hagamuunia luoo mada i de au, doo dangada hai hegau; hagamoolau basa mai gi dagu dalodalo, i hiidinga au gu duasala mmao.

¹⁸ Hagabaa mai gi de au ma gi hagaola ina mai au; hagaola ina mai au i ogu hagadaumee.

¹⁹ Koe e iloo dogu hagangadi mee ina, ma dogu hagadogaa ina aama dogu dee hagadubulia; gai koe e iloo ogu hagadaumee alodahi.

²⁰ Au gu kona mmao de mmae ogu lodo i dogu hagadogaa ina, gai au gu dee baba ogu lodo. Au ne ssala dahi gi lodo aloha mai gi de au, aagai au tee gidee dahi dangada daudahi; au ne ssala dahi dangada gi hagaaneane ina ogu lodo, gai au tee gidee dahi dangada daudahi.

²¹ Gilaadeu ne gaavange mee hagammau gi lodo agu gai, ma de hagaunu au i denga mee mmala.

²² Haia deebele o alaadeu daonga gi se sele; gai delaadeu nnoho paba gi se mee e noodia ai gilaadeu.

²³ Haia gi gohu olaadeu ganomada, gi dee kide ai gilaadeu; gai haia gi bolebole olaadeu angaanga i masavaa alodahi.

²⁴ Hagaduasala ina gilaadeu i doo bole, gai doo lili laumalie gi hagaduasala ina gilaadeu.

²⁵ Haia delaadeu mommee gi ngadi dagodo, gai gi deai dangada e nnoho i lodo olaadeu hale malo.

²⁶ Go hiidinga gilaadeu ne vaivai hai tangada aau gu haele, ma de hagammae tangada aau gu hagalagohia.

²⁷ Hagaduasala ina gilaadeu i haisala lagolago, gai koe aude degi ange gi gilaadeu.

²⁸ Sooloa olaadeu ingoo i lo te beebaa o de mouli, gai olaadeu ingoo gi dee sisi madali dangada e heohi laa.

²⁹ Au e duasala ma de mmae; dogu Maadua, koe gi hagaola ina ma de dugu age au gi de mommee maolunga!

³⁰ Au e daahili e tuhi de ingoo o de Maadua, ma de hagaamua ia aama de hagaahe ange de abodonu.

³¹ Gai Tagi Maolunga e kii ange dono malangilangi i de mee nei i dono malangilangi i denga kaau e hai ai laa ssigidaumaha.

³² Gai gi malangilangi ai gilaadeu e duasala i delaadeu gide mee nei; dangada e saalaa de Maadua e maamaane olaadeu lodo.

³³ I hiidinga Tagi Maolunga e hagallongo talodalo a tangada e duasala, gai ia e dee ngalo ono dangada e nnoho i lo te hale pono.

³⁴ De langi ma henua i lalo gi duuhia ia, ma tai aama mee alodahi e mouli i ono lodo.

³⁵ Go hiidinga de Maadua e hagaola naa Zion ma de ahe ange ga hagatuu age denga aduhale o Judah, gai gilaadeu e nnoho naa i kilaa ga henua ai.

³⁶ Gai dama a ono dangada hai hegau e kave naa ga henua ai, gai dangada e aaloha i de ia e nnoho ai naa.