Psalm 68 - De Beebaa Dabu

Ange gi tagi o taahili. Se Psalm nii David . Se daahili

¹ De Maadua gi hidi age, gai ono hagadaumee gi mavaevae saele; gilaadeu e kino i de ia gi saavini gi hulo gee i ono mada i mua.

² Haia gilaadeu gi dee maaleva bei de useahi e ilihia laa ga gaavee i de madangi; gai de gau baubau e maakau naa i mada luu mada o de Maadua, bei dagodo o de candle e vaivai laa i de ahi!

³ Aagai gilaadeu e heohi e llodo danuaa naa, ma de malangilangi i mada luu mada o de Maadua; gilaadeu gi malangilangi mmao ma de lodo danuaa.

⁴ Daahili ange gi de Maadua, daahili duuhia dono ingoo; daahili ange gi de ia e gage laa i honga denga giliiga — dono ingoo go Iahweh — gai gi malangilangi i ono mada i mua.

⁵ De Maadua e noho laa i honga dono mommee dabu, go tamana o denga gauligi gu deai olaadeu damana, gai ia e buibui denga haahine gu maakau olaadeu bodu.

⁶ De Maadua e gaavange gi tangada hagaaloha dahi huaabodu, ma de hagassao mai dangada i de hale pono ga hagailaage gilaadeu; gai de gau makaga olaadeu lodo e nnoho naa i de henua e deai vai iai.

⁷ De Maadua, de masavaa naa huu oou e hano ai i mada i mua o oo dangada, de masavaa oou ne dagi ai gilaadeu i de vao, Selah

⁸ gai henua i lalo gu ngalungalue, de langi gu hai gi pala iho de langi, i mada i mua o de Maadua, de Maadua o Sinai, i mada i mua o de Maadua, de Maadua o Israel.

⁹ De Maadua, koe ne hai gi kona de bala de langi; koe ne hagammahi de henua o doo boolonga i de masavaa ne baageaa ai.

¹⁰ Oo dangada gu nnoho i kilaa; de Maadua, koe ne hagadanuaa gilaadeu e duasala i doo abodonu.

¹¹ De Ia Aamua e hagailoo ana muna, gai e soa haahine ne hagadele ina muna nei:

¹² “Denga hodooligi ma olaadeu hagabuulinga hebagi gu saavini ma gu hulo gee; denga haahine i mommee nnoho gaainga gu duha goloa ne maua i de hebagi,

¹³ gai ga nnoho naa donu goodou i de mommee iai buibui o denga ssiibi — gai denga bakau o de manu kono e haoli i selevaa, ono hulu manu ni goolo malamalama.”

¹⁴ De masavaa o de Ia Mmahi Mmao laa ne hagadee kii ai denga hodooligi i kilaa, gai denga snow gu malili iho gi honga o Zalmon.

¹⁵ De mounga o de Maadua e bei denga mounga o Bashan; gai mounga o Bashan e lagolago ono ulu!

¹⁶ Denga mounga kangi ulu, gu aha gu llodo gaiaa ange ai goodou gi de mounga a de Maadua gu hili e noho ai e dagi, gai go de mommee o Tagi Maolunga e noho ga hano ai?

¹⁷ Hada hebagi o de Maadua e lagolago ange i tahisemada, gai e lagolago ange i tahiseguli; de Ia Aamua gu humai i Sinai gi dono mommee dabu.

¹⁸ Koe ne hanage gi de mommee maolunga, ma de dagi de gau dee kii madali goe, koe ne kave mee ngadi gaavange mai i daho dangada; aama daho dangada hogi e hai baasi adu, gai koe, Tagi Maolunga de Maadua, ga noho ai i kilaa.

¹⁹ Duuhia de Ia Aamua, de Maadua taadeu Ia Hagaola, go de ia e hagauda ina odaadeu daemaha i laangi alodahi. Selah

²⁰ Taadeu Maadua se Maadua e hagaola ina; de Ia Aamua go Iahweh e hagaola ina gidaadeu mai i de magau.

²¹ De Maadua e hagabalaginagina naa biho o ono hagadaumee, go biho o olaadeu e duudagi ina de hai de baubau.

²² De Ia Aamua e hagadaba, “Au e hagaahe mai naa gilaadeu mai i Bashan, au e hagaahe age naa gilaadeu i lo te moana gelo,

²³ gai koe ga seesee saele ai i lodo olaadeu dodo, gai denga gaaduu e samusamu naa dodo o oo hagadaumee.”

²⁴ De Maadua, gu gidee adu de daga mai o doo hagabuulinga, de hagabuulinga o dogu Maadua ma dogu Hodooligi gu ulu gi lo te mommee dabu.

²⁵ Go de gau daahili i mua, olaadeu dua go de gau hagadangidangi, gai lo te ungaalodo go denga damaa hine e hagailiilia denga tambourine.

²⁶ Hagadegi ina de Maadua i lo te hagabuulinga laumalie, hagadegi ina Tagi Maolunga, goodou de hagabuulinga o de gau Israel.

²⁷ De aamuli o Benjamin e sogoisi laa ono dangada, e dagi gilaadeu, gai denga dagi soa o Judah i kilaa hogi, aama denga dagi hogi o Zebulun ma Naphtali.

²⁸ De Maadua, hagahai hegau ina oo mahi; De Maadua, hagaagona mai gi gimaadeu doo sauaa, go ssauaa aau ne hagahai hegau laa i omaadeu hiidinga.

²⁹ I hiidinga doo temple i Jerusalem, denga hodooligi e gaamai naa gi de goe mee ngadi gaavange.

³⁰ Hagaseegina denga manu i magavaa o denga aalege, ma denga manu mmahi i magavaa o denga kaau gauligi a denga huaahenua. Dagadagahia gi lalo gilaadeu e nnoo ange gi denga selevaa. Haia gi mavaevae saele dangada e malangilangi i de hebagi.

³¹ De gau aamua o Egypt e loomai naa; Ethiopia e ino ange naa gi de Maadua.

³² Denga nohoanga hodooligi i henua i lalo, daahili ange gi de Maadua ma de tuhi de Ia Aamua i taahili, Selah

³³ go de ia e lele laa i lo te langi i lunga mai madagidagi loo; ma de hai gi langona dono leo mmahi.

³⁴ Daalaa dagodo mahi o de Maadua; gai go ia iai ssauaa e dagi i honga o Israel, gai ono mahi e hagaago mai i lo te langi.

³⁵ De Maadua, koe e hagamaatagu mmao, i doo mommee dabu; de Maadua o Israel ne gaavange de mmahi ma ssauaa gi dono huaadangada. Hagadegi ina de Maadua!