Psalm 67 - De Beebaa Dabu

Ange gi tagi o taahili; e hua madali denga mee hagadangidangi iai daula. Se Psalm. Se daahili

¹ De Maadua gi abodonu mai ma de hagamanuuia gidaadeu aama de hagamaalama gidaadeu i de maalama o luoono mada, Selah

² gi iloo ai dagodo o oo haiava i henua i lalo, ma dau hagaola i denga huaahenua alodahi.

³ De Maadua, denga huaadangada gi duuhia goe; denga huaadangada alodahi gi duuhia goe!

⁴ Denga huaahenua gi llodo danuaa ma de daahili i de malangilangi, i hiidinga koe e hagamodu muna o dangada i de heohi gai go koe e dagina denga huaahenua o henua i lalo. Selah

⁵ De Maadua, denga huaadangada gi duuhia goe; denga huaadangada alodahi gi duuhia goe!

⁶ Gai de gelegele e hhua naa manu iai; gai de Maadua, taadeu Maadua, e hagamanuuia naa gidaadeu.

⁷ De Maadua e hagamanuuia naa gidaadeu; gai henua i lalo alodahi e maatagu naa i de ia!