Psalm 66 - De Beebaa Dabu

Ange gi tagi o taahili. Se daahili. Se Psalm

¹ Henua i lalo alodahi, goodou hevaalogi duuhia de Maadua i de malangilangi!

² Daahili mage hagamahamaha ina dono ingoo; gai haia gi mahamaha dono tuhi!

³ Hai ange gi de Maadua, “Au hegau e hagamaatagu mmao! Doo sauaa e laumalie mmao gai oo hagadaumee e bolebole i oo mada i mua.

⁴ Henua i lalo alodahi gi daumaha adu gi de goe; gilaadeu gi duuhia goe i taahili, gilaadeu gi duuhia doo ingoo i taahili.” Selah

⁵ Loomai diiloo mee a de Maadua gu hai: ana hegau i daho dangada e hagamaatagu mmao.

⁶ Ia ne hai gi masa tai bei de uda henua; gai gilaadeu ne seesee ga hulo laa lo te vai. Gimaadeu ne malangilangi i kilaa i de ia

⁷ e dagina ga hano ai i dono sauaa, gai ia e daumada denga huaahenua. De gau hagamaolunga gi dee hai baasi ange gi de ia. Selah

⁸ Denga huaadangada, goodou duuhia taadeu Maadua, gai haia gi langona e dangada doodou tuhi ia;

⁹ ia ne hagaola omaadeu mouli, gai ne daohi gimaadeu gi dee baakuu.

¹⁰ De Maadua, koe gu hagatale ange omaadeu dagodo; koe gu hagagilimalali gimaadeu bei de hagagilimalali o denga selevaa i de ahi.

¹¹ Koe ne buulou gimaadeu i de gatae, ma de hai gimaadeu gi hagauda ina mee daemaha gi honga omaadeu dua.

¹² Koe ne hai dangada gi dagina ma de vaivai hai gimaadeu; gimaadeu ne hulo laa lo te ahi ma de vai; aagai koe ne gaamai gimaadeu gi dahi henua iai mee lagolago.

¹³ Au e gaamai naa gi doo hale agu sigidaumaha dudu; au e hagassula naa donu agu mee gu hagatoo donu ai,

¹⁴ ma agu muna gu tala ma de hagatoo donu ai i de masavaa oogu ne hai ngadaa ai.

¹⁵ Au e hai naa denga sigidaumaha dudu i denga manu pedi, ma de hai gi buu age de useahi o ssigidaumaha o denga ssiibi daane; gai au e hai naa sigidaumaha i denga kaau daane aama denga guudi. Selah

¹⁶ Goodou alodahi e maatagu i de Maadua, loomai hagalaangona, gai au ga tala adu dagodo ana mee ne hai mai gi de au.

¹⁷ Au ne dangi ange ia gi balea mai au, au e hagaamua ia i dagu tuhi.

¹⁸ Noo au e daohi dahi baubau i ogu lodo, gai de Ia Aamua e dee hagallongo dagu dalodalo.

¹⁹ Ni muna abodonu de Maadua e hagallongo; ia e hagallongo donu dagu dalodalo.

²⁰ Hagadegi ina de Maadua, i hiidinga ia tee hagangadi mee dagu dalodalo aabe tee abodonu mai gi de au!