Psalm 64 - De Beebaa Dabu

Ange gi tagi o taahili. Se Psalm nii David

¹ De Maadua, hagalangona agu muna i dogu nanu; buibuia dogu mouli i mee a dogu hagadaumee e hagamadagu ai au.

² Buibui mai au i hagatau a tangada baubau e hagammuni laa, ma mai i de hagabuulinga o dangada e haia de baubau.

³ Olaadeu alelo e kangi bei denga gadilaasa, gai alaadeu muna e bei dao hagamaakau o de mee hholu.

⁴ Gilaadeu e mmuni ma e tili ai tangada tigi haisala; gai gilaadeu e daa hagalele donu de tili ia, gai e dee maatagu.

⁵ Gilaadeu e hagadau hagammahi i alaadeu hagatau baubau; gilaadeu e madaangudu i de hai e hagammuni ai alaadeu sele; gilaadeu e hagataba, “Goai naa donu e gidee mee nei?”

⁶ Gilaadeu e hai dahi hagatau dee heohi, ma de hagataba, “Taadeu hagatau gu hai e danuaa mmao!” Maanadu ma lodo o tangada e gelo mmao.

⁷ Aagai de Maadua e tili naa gilaadeu i dao o dana mee hholu, gai e moolau naa donu de lagolagohia.

⁸ Ia e hai naa alaadeu muna donu gi hai baasi ange gi gilaadeu, gai ia ga oha ai gilaadeu; dangada alodahi e gidee gilaadeu e geugeu naa olaadeu biho.

⁹ Dangada alodahi e maatagu naa; gilaadeu e tala naa dagodo hegau a de Maadua ma de maanadu dagodo o ana hegau gu hai.

¹⁰ Gilaadeu e heohi e malangilangi i Tagi Maolunga, gai gilaadeu e buibui i ono daha; dangada alodahi e heohi gi duuhia ia!