Psalm 60 - De Beebaa Dabu

Ange gi tagi o taahili; gai e hua i de leo o “Denga lilii o de hagatoo donu hagaheloongoi”. De lilii o de tala hagadonu. Se Miktam nii David , e agoago ai. I de masavaa o David ne hebagi ange ai gi Mesopotamia ma Syria Zobah, ma de masavaa o Joab ne ahe mai ai, ga daa ga maakau e 12,000 dangada i Edom , i de Geelonga o denga Soolo

¹ De Maadua, koe gu tili gimaadeu, ma de oha omaadeu buibui; koe ne lili i gimaadeu; ahe ange hagaahea mai gimaadeu!

² Koe ne hagangalungalue de henua ga hai gu mahangahanga; hagaahea age ono mommee gu maoha laa, i hiidinga gu dai baakuu.

³ Koe gu hai oo dangada gi gidee denga masavaa hai ngadaa; koe gu hai gimaadeu gi unumia uvaini gi ssee saele ai gimaadeu.

⁴ Aagai koe gu hagaduu age dahi hagailonga ange gi gilaadeu e maatagu i de goe, gi maua ai e gilaadeu i de hulo e mmuni i de mee hholu. Selah

⁵ Gai hagaola ina gimaadeu i doo lima madau, ma de basa mai gi amaadeu dalodalo, gi ola ai gilaadeu oou e aloha ai.

⁶ De Maadua gu basa mai i dono mommee dabu: “Au e vaevae naa Shechem i de malangilangi, ma de haide de geelonga o Succoth.

⁷ Niiogu Gilead, niiogu Manasseh; Ephraim go dogu goobai baalanga; Judah go dagu laagau hodooligi.

⁸ Moab go dogu beisini gaugau; au e maga ange dogu mee vae gi honga o Edom; gai au e oo e tala dogu kii i Philistia.”

⁹ Goai e gaavee au gi de aduhale buibui laa? Goai e dagina ngau gi Edom?

¹⁰ De Maadua, e dee go koe ne dilia laa gimaadeu, gai gu dee hano madali omaadeu hagabuulinga hebagi?

¹¹ Balea mai gimaadeu e hebagi ange ai gi de hagadaumee, go hiidinga de bale mai i daho dangada e deai ono haigamaiana.

¹² De bale a de Maadua e hagammahi gimaadeu, gai go ia e hagadee kii ina omaadeu hagadaumee.