Psalm 6 - De Beebaa Dabu

Ange gi tagi o taahili; e hua madali denga mee hagadangidangi iai daula. E hua madali de Sheminith . Se Psalm nii David

¹ Tagi Maolunga, koe gi dee hagaseegina loo au i doo lili, gai gi dee haelea mai au i doo bole.

² Tagi Maolunga, abodonu mai gi de au, au gu deai ogu mahi. Tagi Maolunga, hagaieiangi ina ngau, au gu duasala mmao.

³ Gu duasala mmao ogu lodo; Tagi Maolunga, dee hee maa taulooloa?

⁴ Tagi Maolunga, ahe mai hagaola ina dogu mouli; hagaola ina mai au i hiidinga doo lodo aloha e dee helui donu.

⁵ E deai donu se dangada e manadua goe i dua dono magau. Gai goai naa e duuhia goe i de mommee o de gau maakau?

⁶ Au gu dalea mmao i de gonogono; de boo alodahi gai dogu moenga e ssui i ogu loimada, ogu loimada e hai ga ssui dogu mee dagodo.

⁷ Luoogu mada gu hhua i dogu dangi; luoogu mada gu baageaa i hiidinga o ogu hagadaumee.

⁸ Goodou hulo gee mai i ogu daha, go goodou e haia de baubau, go hiidinga Tagi Maolunga gu langona dogu dangi.

⁹ Tagi Maolunga e hagallongo dagu dalodalo, gai Tagi Maolunga e basa mai gi dagu dalodalo.

¹⁰ Ogu hagadaumee alodahi e odi naa i de dookaa ma de maatagu, gilaadeu e saavini naa ga hulo gee i delaadeu dookaa.