Psalm 59 - De Beebaa Dabu

Ange gi tagi o taahili; e hua bei de leo o “Aude oohaa”. Se Miktam nii David , i de masavaa a Saul ne hai ai hanu daane, gi hulo gi mulidagi ina de hale o David, gi daia ai ia gi magau

¹ Dogu Maadua, hagaola ina mai au i ogu hagadaumee, buibuia loo au i gilaadeu e llodo e hai baasi mai gi de au.

² Hagaola ina mai au i gilaadeu e haia de baubau, ma de hagamouli au mai i gilaadeu e daia dangada gi maakau.

³ Tilo, gilaadeu e tali au e daa gi magau; denga daane alasala e hagasaele de hai baasi mai gi de au. Tagi Maolunga, e deai donu ogu haisala aabe ni baubau.

⁴ Au tigi hai donu dahi mee dee heohi, gai gilaadeu gu nnoho e hebagi mai. Hidi age balea mai au; galo mai diiloo ogu dagodo!

⁵ Tagi Maolunga, de Maadua o denga hagabuulinga hebagi, hidi age hagaduasala ina denga huaahenua alodahi; koe gi dee degi ange gi de gau baubau. Selah

⁶ Gilaadeu e aahe mai i de ahiahi, ga koo bei denga gaaduu ma de nnoho saele i lo te aduhale.

⁷ Tilo, gilaadeu e pasa hagamaolunga, gai alaadeu muna e kangi bei de gadilaasa; gilaadeu e hagataba, “Goai naa donu e langona adaadeu muna?”

⁸ Aagai koe, Tagi Maolunga, e gadagada i gilaadeu; koe e doo mee i denga huaahenua alodahi.

⁹ Ogu mahi, au e dagitilo doo dae mai; i hiidinga koe, de Maadua, go dogu mommee buibui makaga.

¹⁰ Dogu Maadua e hedae mai naa gi de au i hiidinga dono abodonu; ia e hai naa gi gidee e au de hagadee kii o ogu hagadaumee.

¹¹ De Ia Aamua, demaadeu mee hungihungi, koe gi dee daia gilaadeu gi maakau, gi dee ngalo ai e ogu dangada. Gai haia gilaadeu gi silivaahea saele i doo sauaa mahi, ma de hai gi dee kii gilaadeu.

¹² I hiidinga haisala o olaadeu ngudu aama alaadeu muna gu tala, gai olaadeu hagamaolunga gi aahe ange donu huu gi gilaadeu. I hiidinga alaadeu muna hagamalaia aama alaadeu muna hhadu ne tala,

¹³ hagallilo ina gilaadeu i doo bole, hagallilo ina gilaadeu ga dae ai gi teai se gilaadeu e doe. Gai henua i lalo alodahi e iloo naa bolo go de Maadua e dagina Jacob. Selah

¹⁴ Ahiahi alodahi gai gilaadeu e aahe mai, ga koo bei denga gaaduu ma de aheahe saele i lo te aduhale.

¹⁵ Gilaadeu e hagadaga saele e sala gai, ma de koo bei denga manu e dee boobosu.

¹⁶ Aagai au e daahili naa e tuhi oo mmahi; au e oo naa i taiao ga daahili i hiidinga doo abodonu. I hiidinga go koe dogu mommee buibui makaga, gai go dogu buibui i de masavaa hai ngadaa.

¹⁷ De Maadua, ogu mahi, au e daahili e tuhi ai goe, go hiidinga go koe dogu mommee buibui makaga, gai go de Maadua e abodonu mai laa gi de au.