Psalm 57 - De Beebaa Dabu

Ange gi tagi o taahili; e hua bei de leo o “Aude oohaa”. Se Miktam nii David , i de masavaa oona ne hano ai ga mmuni i a Saul i lo te haonga i gaogao de mounga

¹ De Maadua, lodo aloha mai gi de au, lodo aloha mai gi de au, go koe dogu buibui; au e ssala dogu buibui i lalo de malu o luoo bakau, ga dae ai gi de sili de madangi mmahi.

² Au e hagahi de Maadua Maolunga Mmao, go de Maadua e hagassula ina dana hagatau mai gi de au.

³ Ia e basa mai i de langi ga hagaola mai au, ia e hagadogaa tangada e hagamaolunga i de au. Selah De Maadua e hagaago mai dono abodonu ma dono hai hegau i de muna abodonu.

⁴ Au e noho i magavaa o denga laiono; au e dagodo i magavaa o denga manu alasala: go dangada e hanu olaadeu niho e bei denga dao nnui aama dao o de mee hholu, olaadeu alelo e kangi bei denga gadilaasa.

⁵ De Maadua, doo hagaamua gi maolunga ange i de langi, gai doo mahamaha gi dagodo i henua i lalo alodahi.

⁶ Gilaadeu e dugu de galauna e buulou ai au; gai au gu kona mmao de manavasaa ogu lodo. Gilaadeu gu geli dahi geelinga i honga dogu haiava e seesee ai, aagai go gilaadeu donu huu ne too ange gi ono lodo. Selah

⁷ De Maadua, ogu lodo e dee sui donu, ogu lodo e dee sui donu; au e daahili ma de tuhi goe!

⁸ Dogu hagasaalunga, alahage! De harp ma de lyre, gooluu aalahage! Au e alahage naa hogi i taiao gohugohu.

⁹ Dogu Ia Aamua, au e hagaahe adu de abodonu i magavaa o denga huaadangada; au e daahili ga tuhi goe i magavaa o denga huaahenua.

¹⁰ Go hiidinga doo abodonu e laumalie mmao, gai e hano loo ga dae gi de langi; doo hai hegau i de mee abodonu e dae loo gi lo te langi i lunga.

¹¹ De Maadua, doo hagaamua e maolunga ange i de langi, gai doo mahamaha gi dagodo i henua i lalo alodahi!