Psalm 56 - De Beebaa Dabu

Ange gi tagi o taahili; e hua bei de leo o “De manu kono i honga denga oak i de mommee mmao”. Se Miktam nii David , i de masavaa o de gau Philistia ne poo ai ia i Gad

¹ De Maadua, abodonu mai gi de au, i hiidinga dangada e llodo e vaivai hai au; gilaadeu e hebagi mai gi de au i laangi alodahi.

² De gau hagabaubau dangada e doolohi au mai i taiao ga boo ai; gai e soa dangada e hebagi mai gi de au i delaadeu hagamaolunga.

³ De masavaa oogu e madagu ai, gai au e hagadonusia goe.

⁴ Au e tuhi de Maadua i hiidinga ana muna, au e hagadonu de Maadua; au e dee madagu donu. Gai ni aha naa a dahi dangada e maua i de hai mai gi de au?

⁵ Mai i taiao ga boo ai gai gilaadeu e hagadee heohi agu muna; gilaadeu e hagatau delaadeu hai e hagammae ai au.

⁶ Gilaadeu e hagabuni ma e nnoho ai, gilaadeu e mmuni. Gilaadeu e mulidagi agu mee e hai; gilaadeu e llodo mmao e kave dogu mouli.

⁷ Koe e dee dugu ange gilaadeu gi ola, i hiidinga olaadeu baubau; de Maadua, koe gi hagaduasala ina denga huaahenua i doo bole!

⁸ Koe e daohi ogu hanonga e silivaahea saele ai, ma de hhao ogu loimada gi lo tau manu hao vai. E aha, e dee gu lava laa i de sisi ma gu daohi mee nei?

⁹ Ogu hagadaumee e saavini naa ga hulo gee i de masavaa aagu e hagahi ai goe gi balea mai au. Deenei dagu hai e iloo ai bolo de Maadua e bale mai au.

¹⁰ Au e tuhi de Maadua i hiidinga o ana muna, au e tuhi Tagi Maolunga i hiidinga o ana muna;

¹¹ au e hagadonusia de Maadua; au e dee madagu donu. Gai se aha naa donu a dahi dangada e maua i de hai mai gi de au?

¹² De Maadua, au e hagasula naa donu agu mee gu hagatoo donu adu ai gi de goe; au e gaavadu naa gi de goe ssigidaumaha e hagaahe adu ai de abodonu gi de goe.

¹³ Gai koe gu hagaola mai au i de magau, ma de hai gi dee baguu au, gai au ga seesee ai i mada luu mada o de Maadua i de maalama o de mouli.