Psalm 55 - De Beebaa Dabu

Ange gi tagi o taahili; e hua madali denga mee hagadangidangi iai daula. Se Maskil nii David

¹ De Maadua, hagalaangona dagu dalodalo, koe gi dee hagangadi mee ina dagu dangidangi!

² Anga mai ma gi basa mai gi dagu dalodalo; au gu kona mmao dogu hai ngadaa. Gai gu dee baba mmao ogu lodo

³ i muna a ogu hagadaumee, ma mee hagadaemaha a de gau baubau. Gilaadeu e hagahai ngadaa dogu mouli, gai e vaivai hai au i delaadeu kino i de au.

⁴ Au gu kona mmao de manavasaa ogu lodo, gai denga mee hagamaatagu o de magau gu paa mai gi de au.

⁵ Au gu madagu ma de bolebole; de mee hagamaatagu gu hagamadagu au.

⁶ Gai au e hagadaba, “Mee naa gi hanu ogu bakau bei dahi manu kono! Gai au ga lele e hano e hagamabu;

⁷ au e hano naa gi dahi mommee mmao, au e hano naa ga noho i de vao. Selah

⁸ Au e hagamoolau e hano gi dogu mommee buibui, gi mmao gee ai au i de madangi ssau ma de mmahi.”

⁹ Dogu Ia Aamua, haia gi dee heloongoi de gau baubau, go hiidinga au gu gidee de vaivai haia o dangada ma de hebagi i lo te aduhale.

¹⁰ Gilaadeu e hagadaga saele i de laangi ma de boo i honga de buibui o de aduhale; de baubau ma de hai ngadaa gu i lo te aduhale.

¹¹ Gu maoha mee alodahi i lo te aduhale; mee hagamaatagu ma denga muna hhadu gu dagodo i honga ono haiava.

¹² Noo au e hagadogaa ina i daho tangada e kino i de au, gai au e maua donu i de golomagi ogu lodo; noo se hagadaumee e hagamaolunga i de au, gai au e maua i de mmuni i de ia.

¹³ Aagai go koe, dahi dangada e bei ogu dagodo, se dangada e iloo au, gai se soa donu niiogu —

¹⁴ i mua gai gimaadeu e dee modu de hagabuni ga madaangudu; gai gimaadeu ne hagabuni ga seesee gi de hale o de Maadua.

¹⁵ Mee naa gi moolau delaadeu maakau; gai gi mouli ga hulo ai gi de mommee o de gau maakau; de baubau e dagodo i olaadeu mommee nnoho ma olaadeu lodo!

¹⁶ Aagai au e hagahi de Maadua; gai Tagi Maolunga ga hagaola ai au.

¹⁷ De ahiahi, taiao aama de hualaangi gai au e dangidangi i de duasala ogu lodo, gai ia ne hagallongo dogu dangi.

¹⁸ Ia e hagaola mai au i de hai ngadaa ma gilaadeu e hebagi mai gi de au, go hiidinga e soa donu e hai baasi mai gi de au.

¹⁹ Gai de Maadua gu hodooligi laa mai madagidagi, ia e langona, ga hagaduasala gilaadeu; Selah go hiidinga gilaadeu e dee llodo donu e sui, gai e dee maatagu i de Maadua.

²⁰ Dogu soa gu hai baasi ange gi ono soa donu, gai ia gu oha dana hagatoo donu hagaheloongoi.

²¹ Ana muna e segesege bei denga kiliisi, aagai ono lodo e maanadu de hebagi; ana muna e ssali ngaohie ange i lolo, aagai e bei donu de gadilaasa kangi gu dada mai laa e tuu ai dahi mee.

²² Hagauda ina ange oo daemaha gi honga o Tagi Maolunga, gai ia ga bale adu goe; ia e dee dugu ange naa donu tangada heohi gi baguu.

²³ Aagai koe, de Maadua, e tili iho naa de gau baubau gi lo te geelonga o de gau maakau; gai de gau daa dangada ma de daahangadia dangada e dee maua naa donu gi madohi lua olaadeu laangi e mouli ai. Aagai au e hagadonusia goe.