Psalm 54 - De Beebaa Dabu

Ange gi tagi o taahili; e hua madali denga mee hagadangidangi iai daula. Se Maskil nii David , i de masavaa a taane Ziph ne hano ai ga tala ange gi a Saul , “David e mmuni i omaadeu daha”

¹ De Maadua, hagaola ina ngau i ssauaa o doo ingoo, gai gi daalaa bolo au e heohi i doo sauaa.

² De Maadua, hagalaangona dagu dalodalo; gai hagalaangona agu muna.

³ De gau henua gee gu hebagi mai gi de au, de gau alasala gu ssala de hai e daa ai au gi magau; gilaadeu e dee hagadubu de Maadua. Selah

⁴ Ni muna abodonu, go de Maadua e balea mai au; gai go de Ia Aamua e daohia gi dee baguu au.

⁵ Ia e sui ange naa hegau baubau a ogu hagadaumee; daia gilaadeu gi maakau i hiidinga koe e hai hegau i de mee abodonu.

⁶ Au e ngadi gaavadu gi de goe dahi sigidaumaha; Tagi Maolunga, au e tuhi doo ingoo, go hiidinga doo ingoo e danuaa.

⁷ Go hiidinga ia gu hagaola mai au i ogu hai ngadaa, gai au gu gidee tee kii o ogu hagadaumee.