Psalm 53 - De Beebaa Dabu

Ange gi tagi o taahili, e hua bei de leo o de Mahalath . Se Maskil nii David

¹ Tangada lodo senga e hagadaba i ono lodo, “E deai donu se Maadua.” Gilaadeu alodahi e hakino gee, alaadeu hegau e hai e baubau; e deai donu se dangada e haia tanuaa.

² De Maadua e galo iho i de langi ma e tilo dangada, e tilo be hanu gilaadeu e heiangi, aabe hanu gilaadeu e saalaa de Maadua.

³ Gilaadeu alodahi gu huuhuli gee; gilaadeu alodahi gu hakino gee; gu deai donu se dangada e haia tanuaa, gu deai donu se dangada daudahi.

⁴ E aha, dangada e haia de baubau tigi heiangi nei donu — go gilaadeu e vaivai haia ogu dangada bei de gai a dangada pelaoaa, gai gilaadeu e dee dalodalo ange gi de Maadua?

⁵ Gai olaadeu dagodo, de mommee e deai ai se mee hagamaatagu gai gilaadeu e kona mmao de maatagu. Gai de Maadua e hagassii saele naa ivi o dangada e hebagi adu gi de goe. Koe gu hagadookaa gilaadeu, go hiidinga de Maadua gu tili gilaadeu.

⁶ Mee naa gi humai de hagaola o Israel i Zion! De masavaa a de Maadua e hagaahe ange ai de manuuia o ono dangada, gai Jacob gi malangilangi, Israel gi lodo danuaa!