Psalm 51 - De Beebaa Dabu

Ange gi tagi o taahili. Se Psalm nii David , i de masavaa o de pelaabisi go Nathan ne humai ai gi ono daha, i dua dono dagodo haisala madali Bathsheba

¹ De Maadua, degi mai gi de au gi bei dagodo o doo abodonu; sooloa gi deai ogu haisala, bei de laumalie o doo lodo aloha.

² Sooloa gi odi ogu baubau alodahi, ma de hagagilimalali au mai i ogu haisala.

³ Gai au e iloo donu dagodo o ogu haisala, ogu haisala e daakodo i ogu mada i mua i masavaa alodahi.

⁴ Au e hai baasi adu donu gi de goe, i dogu haisala, ma de hai de baubau i mada luoo mada, deenei ai, koe e heohi donu i doo masavaa e basa ai, gai e heohi donu dau hagamodu muna.

⁵ Ni muna abodonu, au se dangada baubau mai i dogu haanau, gai au ne haisala mai donu i de masavaa oogu ne hagadili ai i daho dogu dinana.

⁶ Ni muna abodonu, koe e lodo gi dagodo de mee abodonu i de lodo; gai koe agoagona mai ogu lodo i de heiangi abodonu.

⁷ Hagagilimalali ina au i de hyssop, gi gilimalali ai au; hakaugau ina mai au, gi tea ange ai au i denga snow.

⁸ Haia gi malangilangi au ma de lodo danuaa; koe gu hadihadi ogu ivi, haia gi ahe ange au gi malangilangi.

⁹ Hagamuunia luoo mada i ogu haisala, gai sooloa ogu baubau alodahi.

¹⁰ De Maadua, hagagilimalali ina ogu lodo, gai hagahoou ina de hagasaalunga heohi i ogu lodo.

¹¹ Koe gi dee aaua gee au i mada luoo mada, aabe gi gaavee gee doo Hagasaalunga Dabu mai i ogu daha.

¹² Haia gi ahe ange au gi malangilangi i dau hagaola, gai gaamai gi de au de lodo e daudali adu.

¹³ Gai au ga agoago ange ai de gau haisala oo haiava, gai gilaadeu e aahe mai naa gi de goe.

¹⁴ De Maadua, hagaola ina mai au i de magau; de Maadua go koe dogu hagaola, gai au e daahili naa ga tuhi dagodo o doo heohi.

¹⁵ Dogu Ia Aamua, huugea dogu ngudu, gai au ga tuhi ai goe.

¹⁶ Au e maua i de gaamai dahi sigidaumaha gi de goe, gai e dee deenei doo mee lodo danuaa ai; koe e dee malangilangi i sigidaumaha dudu.

¹⁷ Gai denga sigidaumaha o de Maadua e lodo ai go de daemaha de lodo i baubau; de Maadua, koe e dee hagangadi mee de lodo e daemaha i baubau aama de dahuli de lodo.

¹⁸ Koe gi malangilangi i de hai ange tanuaa gi Zion; hagaduulia age de buibui o Jerusalem;

¹⁹ gai gi malangilangi ai goe i denga sigidaumaha heohi, ma denga sigidaumaha dudu, aama sigidaumaha e dudu alodahi, gai ssigidaumaha o denga kaau e hai naa i honga dau mommee o ssigidaumaha.