Psalm 50 - De Beebaa Dabu

Se Psalm nii Asaph

¹ De Maadua Mmahi Mmao laa, go Iahweh e basa ma de hagahi henua i lalo mai i de sobo age o de laa ga dae ai gi de danu.

² De maalama o de Maadua e hagaago mai i Zion, go de aduhale e honu abodonu dono mahamaha.

³ Taadeu Maadua e humai, gai ia e dee noho naa donu huu ga dee muu; de ahi e dudu mee alodahi i ono mada i mua, gai de madangi mmahi e ssau ma e duuli ai ia.

⁴ Ia e hagahi de langi i lunga ma henua i lalo, gai ia ga hagamodu ai muna o ono dangada:

⁵ “Hagabuni ina mai ogu dangada e hai hegau i de muna abodonu, go gilaadeu ne haia dahi hagatoo donu hagaheloongoi madali au ga hagasauaa i dahi ssigidaumaha.”

⁶ De langi e hagaago mai de heohi o de Maadua, i hiidinga go ia donu de ia hagamodu muna! Selah

⁷ “Ogu dangada, goodou nnoho mai hagalaangona, gai au ga basa adu, Israel, au e hagabaubau oo dagodo. Go au de Maadua, doo Maadua.

⁸ Au e dee hagasee goe i hiidinga o au sigidaumaha, aabe go au sigidaumaha dudu, e gaamai gi de au i masavaa alodahi.

⁹ Au e dee malangilangi i dahi kaau daane mai i doo hale, aabe go dahi guudi mai i lodo au buibui manu.

¹⁰ Go hiidinga manu lodo henua alodahi niiagu, gai niiagu denga manu i honga duuduu lagolago.

¹¹ Au e iloo denga manu llele alodahi i honga denga mounga, gai manu alodahi e nnoho saele i honga de gelegele niiagu.

¹² Noo au gu hiigai, gai au e dee tala adu gi de goe, go hiidinga henua i lalo ma mee alodahi iai niiagu.

¹³ Au e dee gai kano o denga kaau, aabe unu dodo o denga guudi.

¹⁴ Hagaahe ange de abodonu gi de Maadua i ssigidaumaha, koe gi hagassula ina au hagatoo donu ange gi de Ia Maolunga Mmao laa,

¹⁵ ma de hagahi mai au i de masavaa o de hai ngadaa gai au ga hagaola ai goe, gai koe ga hagamahamaha ai au.” Selah

¹⁶ Aagai de Maadua e hai ange gi tangada baubau: “Goai ne dugu adu koe gi hagamaumau ina agu hainga, aabe go de tala dagu hagatoo donu hagaheloongoi?

¹⁷ Koe e kino i dagu hagaheohi adu goe, gai koe e dee anga ange gi agu muna.

¹⁸ Noo koe e gidee dahi dangada gaiaa, gai koe e hai soa ange gi de ia, koe e hagabuni ange gi de gau dagodo haisala.

¹⁹ Doo ngudu e abo i de tala mee baubau, gai doo alelo e honu i de daahanga dangada.

²⁰ Koe e duudagi huu de hai baasi ange gi doo daina; ma de hagabaubau tama daane a doo dinana donu.

²¹ De masavaa aau ne hai ai mee nei, gai au tee muu adu donu; gai koe e maanadu bolo au e bei oo dagodo. Aagai iainei au e hagasee goe, ma de hagabaubau goe.

²² Goodou gu ngalo laa de Maadua, hagasaelea de mee nei, au kana hangahanga goodou, gai gu deai e maua i de hagaola goodou.

²³ Tangada e haia de hagaahe mai de abodonu go dana sigidaumaha e hagadubu au, gai au e hagaago ange gi tangada e seesee i de heohi de hagaola a de Maadua.”