Psalm 5 - De Beebaa Dabu

Ange gi tagi o taahili; e hua madali denga flute . Se Psalm nii David

¹ Tagi Maolunga, hagalaangona dagu dangidangi; gai anga mai i dogu manava i lunga.

² Dogu Hodooligi, gai go dogu Maadua, hagalaangona dogu dangi adu i dau bale, go hiidinga au e dalodalo adu gi de goe.

³ Tagi Maolunga, koe gi hagalangona dagu dangidangi i taiao, au e hagadabena dagu sigidaumaha adu gi de goe i taiao ma de noho ga tali ⌊doo basa mai⌋.

⁴ Koe se Maadua e dee malangilangi i de baubau; de baubau e dee maua donu gi dagodo i oo daha.

⁵ Tangada basa hagamaolunga e dee maua i de duu i mada luoo mada; koe e kino i gilaadeu alodahi e haia de baubau.

⁶ Koe e daa naa ga maakau gilaadeu e hadu muna; Tagi Maolunga e kino i gilaadeu e daia dangada ga maakau, aama gilaadeu e daahangadia dangada.

⁷ Aagai au e ulu naa i doo hale i hiidinga de laumalie doo abodonu, au e huli ange naa gi doo temple dabu ga daumaha.

⁸ Tagi Maolunga, dagina ngau i doo heohi, i hiidinga o ogu hagadaumee; haia gi soe doo haiava i ogu mada i mua.

⁹ E deai se gilaadeu e maua i de tala de muna abodonu, gilaadeu e maanadu donu huu de daa dangada. Olaadeu holomanga e bei taanunga e mahuge laa; gilaadeu e hagasegesege ange i alaadeu muna.

¹⁰ De Maadua, hagaduasala ina gilaadeu i olaadeu baubau; alaadeu hagasaele gi daia donu huu gilaadeu gi maakau. Hagaduasala ina gilaadeu i hiidinga olaadeu haisala lagolago, go hiidinga gilaadeu e hai baasi adu gi de goe.

¹¹ Aagai alodahi e buibui i oo daha gi malangilangi; gilaadeu gi hevaalogi i de malangilangi. Koe gi doohaa dau buibui i olaadeu elunga, gi malangilangi ai gilaadeu e aaloha i doo ingoo.

¹² Tagi Maolunga, koe e hagamanuuia tangada e heohi, ma de buibui ia i doo abodonu bei de mee hungihungi.